Prezıdent: Jasandy ıntellekt jastarǵa jan-jaqty damýǵa múmkindik berip otyr
ASTANA. KAZINFORM – Prezıdent Qasym-Jomart Toqaev AI & Digital Bridge – 2026 halyqaralyq forýmynda jasandy ıntellekt jastarǵa sapaly bilim alyp, jan-jaqty damý úshin mol múmkindik berip otyrǵanyn aıtty.
– Jastarymyz osy múmkindikti tıimdi paıdalanyp, jasandy ıntellektini erkin meńgergen, ár nársege syn kózben qaraıtyn bilimdi tulǵa bolyp qalyptasqany mańyzdy, – dedi Prezıdent.
Memleket basshysy sóz sońynda Qazaqstan jańa tehnologııalyq ekonomıkanyń berik negizin qalaǵanyn aıtty.
– Tsıfrlandyrý jáne jasandy ıntellekt jylynyń basty maqsaty – qol jetkizilgen tabystardy ár azamattyń ıgiligine aınaldyrý. Jańa tehnologııalyq dáýirde elimizdiń laıyqty oryn alýyna qajetti alǵysharttar bar. Tabysymyz tereń bilimge, batyl sheshimderge, pragmatıkalyq tásilder men jaýapty is-áreketke baılanysty bolmaq. AI & Digital Bridge talanttar men ıdeıalardy biriktirip, halyqaralyq yntymaqtastyqty tereńdete túsetinine, órshil jobalardy qolǵa alýǵa yqpal etetinine senimdimin, – dedi Qasym-Jomart Toqaev.
Tehnologııalyq forýmnyń plenarlyq otyrysynda General Atlantic tóraǵasy jáne bas dırektory Ýılıam Ford, NVIDIA vıtse-prezıdenti Rev Lebaredıan, Network School negizin qalaýshy Baladjı Shrınıvasan, OneWeb, E-Space negizin qalaýshy Greg Ýaıler sóz sóıledi.
Qasym-Jomart Toqaev jasandy ıntellektini jaýapkershilikpen qoldaný mádenıetin ilgeriletýdiń mańyzy zor ekenin aıtqan bolatyn.
