Prezıdent jasandy ıntellekt tehnologııasyn EAEO qyzmetine engizýdi usyndy

ASTANA. KAZINFORM — Qasym-Jomart Toqaev Joǵary Eýrazııalyq ekonomıkalyq keńestiń otyrysynda jasandy ıntellekt tehnologııasyn EAEO qyzmetine engizýdi usyndy, dep habarlaıdy Aqorda.

Memleket basshysy EAEO-nyń ekonomıkalyq áleýetin odan ári nyǵaıtý qajet ekenine nazar aýdaryp, ıntegratsııalyq birlestikti damytýdyń basym baǵyttaryn aıqyndady.

– Álem jappaı tsıfrlyq transformatsııa men jasandy ıntellekt dáýirine qadam basty. Ýaqyt aǵymynan qalmaı, zamanaýı tehnologııalardy EAEO-ǵa múshe elder ekonomıkasynyń barlyq salasyna engizý qajet dep sanaımyn. Jasandy ıntellekt tehnologııasyn EAEO qyzmetine engize bastaýdy usynamyz. Atap aıtqanda, mundaı júıelerdi saýda aǵynyn josparlaýǵa jáne kedendik baj salyǵynyń yqpalyn baǵalaýǵa qazirdiń ózinde paıdalanýǵa bolady. Kelesi jyly Qazaqstan uıymǵa tóraǵalyǵy aıasynda dástúrli Eýrazııa ekonomıkalyq forýmyn ótkizedi. Osy jıynda Ekonomıkalyq odaq keńistiginde Jasandy ıntellektini jaýapkershilikpen paıdalaný týraly birlesken málimdeme qabyldaýǵa bolar edi, – dedi Memleket basshysy.

Aıta keteıik, buǵan deıin Memleket basshysy bıyl EAEO-ǵa múshe memleketterdiń jıyntyq ІJÓ kólemi 2 paıyzǵa ulǵaıatynyn aıtty.