Prezıdent jasandy ıntellekt dáýirindegi álemdik ahýaldyń turaqsyzdyǵy týraly aıtty
ASTANA. KAZINFORM – Taıaý Shyǵystaǵy qaqtyǵys pen jahandyq turaqsyzdyqtyń áseri týraly aıtty. Bul týraly Aqordanyń basapsóz qyzmeti habarlady.
– Jer sharyndaǵy barsha adamzat «týrbýlenttilik» degen sózdi jaqsy biledi. Áýe kemesi «týrbýlentti» aımaqqa engen sátte jolaýshylardy sabyrǵa shaqyratyn ushqyshtarǵa qaraǵanda, saıasatkerler men sarapshylar halyqaralyq ahýaldy sıpattaýda osy sózdi jıi qoldanyp júr. Shynynda, búkil álem turaqsyz ári baǵdarsyz shaqta ómir súrýge májbúr. Keıingi on jyl ishinde bolǵan oqıǵalar birinen biri asyp túsedi. Bul úderis áleýmettik jelidegi talqylaýlardyń ózegine aınaldy. Onda aqıqat pen ańyz, konspırologııa men jalǵan málimet, qaıǵy-qasiret pen qýanysh qatar kórinis tabýda. Jasandy ıntellekt dáýirine qadam basqan álemniń búgingi keıpi osyndaı.
Ótken eki apta álemdik qoǵamdastyqqa dúrbeleńniń shyn máninde qanshalyqty qaýipti ekenin ári tutqıyldan keletinin anyq kórsetti. Planetamyzdyń tirshiliginde turaqsyzdyq beleń aldy. Tipti, ekonomıkasy ilgeri, ornyqty memleketterdiń ózi áp-sátte jahandyq qaqtyǵystyń, eger ár nárseni óz atymen aıtar bolsaq, soǵystyń ortasynda qaldy. Soǵys órti irgemizden, ıaǵnı Kaspıı mańyndaǵy kórshiles eldiń aýmaǵynan shyqty. Taıaý Shyǵystaǵy ahýaldyń ýshyǵýy qazirdiń ózinde jahandyq qaýipsizdiktiń irgesin shaıqap, álem ekonomıkasyna zardabyn tıgizgeni anyq. Kóshbasshy memleketter jetekshileri arasyndaǵy senim daǵdarysynyń kúsheıýi, iri elder men bloktardyń jik-jikke bólinýi, yntymaq-birlikte ómir súrý psıhologııasy men prıntsıpteriniń toqyraýǵa ushyraýy, halyqaralyq quqyqtyń saqtalmaýy, BUU bedeliniń buryn-sońdy bolmaǵan deńgeıge tómendeýi búgin bastan keship otyrǵan qaterli jaǵdaıǵa sebep boldy, - dedi Memleket basshysy.
Eske sala keteıik, buǵan deıin Memleket basshysy Qasym-Jomart Toqaev barlyq deńgeıdegi máslıhat depýtattarynyń ІІІ respýblıkalyq forýmynda sóz sóılegenin jazǵanbyz.
