Prezıdent Jarlyǵymen erlik kórsetken qutqarýshylar men polıtseıler marapattaldy
TÚRKІSTAN. QazAqparat – Búgin Túrkistan oblysyna kelgen QR Іshki ister mınıstri Erlan Turǵymbaev Prezıdent Jarlyǵymen marapattalǵan Tótenshe jaǵdaılar jáne Polıtsııa departamentteriniń qyzmetkerlerine medaldardy tabys etti, dep habarlaıdy QazAqparat.
Saltanatty shara óńirlik Polıtsııa departamentiniń ǵımaratynda ótti.
Atap aıtqanda, «Erligi úshin» medalimen Túrkistan oblystyq TJD qyzmetkerleri - Baqdáýlet Álimqulov, Quralbek Jumabaev, Rústem Saıdahmetov, Baǵlan Úbaıdillaev pen Polıtsııa departamentiniń maıory Qanat Raqyshev marapattaldy. Sondaı-aq polıtsııa podpolkovnıgi Ermek Óserbaev pen polıtsııa leıtenanty Qaırat Álekeshevke Іshki ister mınıstriniń buıryǵymen «Órtte kórsetken qaısarlyǵy úshin» medaldary tabystaldy.
Órt kezinde jedel qımyldap ózderiniń qyzmettik mindetterin minsiz oryndaǵan qyzmetkerlerdi quttyqtaǵan mınıstr E.Turǵymbaev: «Bizdiń ishki ister organy qatarynda óziniń erligin kórsetip, antyna adal bolyp kele jatqan sizder sekildi qyzmetkerler barda halyqtyń uıqysy tynysh jáne qaýipsiz bolatyndyǵyna senimim mol», - dep atap ótti.
Odan ári QR ІІM basshysy Túrkistan oblystyq TJD qyzmetkeri azamattyq qorǵaý podpolkovnıgi Baqytjan Ábdýǵapparovtyń úıine baryp, oǵan ІІ dárejeli «Aıbyn» ordenin tabys etti. Ol órtti aýyzdyqtaý kezinde aýyr jaraqat alyp, úıinde emdelýde. Mınıstr podpolkovnık B.Ábdýǵapparovqa jáne onyń otbasyna órt sóndirý jáne adamdardy qutqarý kezinde kórsetken batyldyǵy, batyrlyǵy men janqııarlyǵy úshin alǵys aıtty. Sondaı-aq tez arada saýyǵyp ketýine tilektestik bildirdi.
Baqytjan Ábdýǵapparov Arys qalasynda azamattardy qutqarý kezinde de óziniń qaısarlyǵymen erekshe kózge túsken bolatyn.
Eske sala keteıik, aǵymdaǵy jyldyń 10 qyrkúıeginde Túrkistan qalasyndaǵy iri qonaqúılerdiń biri «Roıal Grand» otqa oranǵan bolatyn. Oqıǵa ornyna kelgen oblystyq TJD qyzmetkerleri men polıtseıler jaqyn mańdaǵy aýmaqty qorshaýǵa alyp, qonaqúıdiń qonaqtary men qyzmetkerlerin dereý evakýatsııalaýǵa kirisken bolatyn. Qutqarý jumystaryn júrgizý barysynda 50 adam qaýipsiz jerge shyǵaryldy.
«Sol sátte, tártip saqshysy Qanat Rakıshev óz ómirin qaýipke tigip, otqa oranǵan ǵımarattan shyǵa almaı qalǵan Túrkııa eliniń eki professory men 4 jasar búldirshindi din aman alyp shyqqan edi. Osyndaı erligimen kózge túsken batyrymyz búginde Túrkistan oblysy Polıtsııa departamentine qarasty Patrýldik polıtsııa batalonynyń qyzmetkeri, Otanyna degen adaldyǵymen qaltqysyz qyzmet etýde», - dedi oblystyq Polıtsııa departamentinen.
Budan bólek, mınıstr Polıtsııa departamentiniń ǵımaratyn aralap, polıtseılerdiń qym-qýyt jumysymen de tanysty. Departament janynan ashylǵan halyqtyq-keńsede bolyp, polıtseılerdiń jańa formattaǵy qyzmetin kórip qaıtty.
