Prezıdent Jarlyǵymen áleýmettik osal sanattaǵy adamdardyń quqyǵyn qorǵaıtyn ýákil ınstıtýty quryldy

ASTANA. QazAqparat – Memleket basshysy Halyqtyń áleýmettik osal sanattarynyń quqyqtary jónindegi ýákil ınstıtýtyn qurý týraly Jarlyqqa qol qoıdy, dep habarlaıdy QazAqparat tilshisi.

«Qazaqstan Respýblıkasynda halyqtyń áleýmettik osal toptarynyń quqyqtary men zańdy múddelerin qorǵaý júıesin jetildirý maqsatynda qaýly etemin:

Óz qyzmetin qoǵamdyq negizde júzege asyratyn QR Prezıdentiniń janyndaǵy Halyqtyń áleýmettik osal sanattarynyń quqyqtary jónindegi ýákil ınstıtýty qurylsyn. Ýákildiń negizgi maqsattary halyqtyń áleýmettik osal sanattarynyń quqyqtary men zańdy múddeleriniń kepildikterin qamtamasyz etý, sondaı-aq memlekettik jáne qoǵamdyq ınstıtýttarmen ózara is-qımylda olardyń buzylǵan quqyqtary men bostandyqtaryn qalpyna keltirý bolyp belgilensin», - delingen Prezıdent qol qoıǵan Jarlyqta.

Málim bolǵandaı, Jarlyq qol qoıylǵan kúninen bastap qoldanysqa engiziledi jáne onyń oryndalýyn baqylaý QR Pezıdentiniń Ákimshiligine júkteledi.