Prezıdent Jarlyǵy: 1,1 mln qazaqstandyqtyń nesıesiniń 33,6 mlrd teńge ósimaqysy keshirildi

ALMATY. QazAqparat – QR Ulttyq bankinde QR prezıdentiniń «Qazaqstan azamattarynyń qaryzdyq júktemesin azaıtý týraly» Jarlyǵynyń qalaı júzege asyp jatqany aıtyldy, dep habarlaıdy QazAqparat tilshisi.

«Prezıdent Jarlyǵyn oryndaý aıasynda QR Ulttyq banki «Memlekettik nesıe bıýrosy, «Problemalyq nesıeler bıýrosy», ekinshi deńgeıli bankter men shaǵyn qarjylandyrý ortalyqtarymen birige otyryp, 2019 jyldyń 1 maýsymyndaǵy kepilsiz nesıelerdiń ósimaqysy men aıyppuldaryn keshirdi. Ulttyq banktiń 2019 jylǵy 2 shildedegi №116 qaýlysymen belgilengen tetikterdiń kómegimen bankter men shaǵyn qarjylandyrý ortalyqtary 30 shildege deıin 1 193 091 azamattyń 33,6 mlrd teńge kólemindegi aıyppuldary men tólenbegen nesıeleriniń ósimaqysyn keshirdi», - dedi Ulttyq bank ókili.

Bul protsester eń aldymen bankter men shaǵyn qarjylandyrý uıymdarynyń qarjysynyń esebinen jasaldy.

2019 jyldyń 20 tamyzyna deıin «Problemalyq nesıeler» qory ekinshi deńgeıli bankter men shaǵyn qarjy ortalyqtaryna qaryzdy óteý somasynyń 30% óteıdi.

«Áleýmettik qoldaý bir márte jasalyp otyr. Bolashaqta kepilsiz nesıelerdi ońdy-soldy taratýǵa qatysty QR Prezıdenti Ulttyq bankke qarjylyq uıymdardyń jaýapkershiligin qataıtý, kúnkóris deńgeıinen tómen tabys tabatyn azamattarǵa nesıege tyıym salý boıynsha jumysyn retteý tapsyryldy», - dedi Ulttyq bank ókili.