Prezıdent Jarlyǵymen Joǵary aýdıtorlyq palatanyń quzyreti keńeıtildi
ASTANA. KAZINFORM — Qazaqstan Respýblıkasy Prezıdentiniń Jarlyǵymen Joǵary aýdıtorlyq palata týraly erejege ózgerister men tolyqtyrýlar engizildi.

Qujatqa sáıkes, Joǵary aýdıtorlyq palatanyń mindeti men ókilettigi naqtylandy. Atap aıtqanda, palataǵa Qazaqstan Respýblıkasynyń zańnamasyna sáıkes sotqa talap qoıý quqyǵy berildi. Bul quqyq bıýdjetke ótemaqy óndirip alý, jumysty oryndaý, qyzmet kórsetý, taýarlar jetkizý arqyly qalpyna keltirýdi, sondaı-aq anyqtalǵan quqyq buzýshylyqtar boıynsha somaǵa esep júrgizýdi jáne azaıtýdy, nusqamany oryndaýdy qamtamasyz etý maqsatynda qoldanylady.
Odan bólek, Joǵary aýdıtorlyq palata quzyretine respýblıkalyq bıýdjettiń jobasyn onyń negizgi shyǵys baǵyty boıynsha aldyn ala baǵalaý engizildi.
Sonymen qatar, Prezıdenttiń «Respýblıkalyq bıýdjettiń jobasyn, túzetilgen respýblıkalyq bıýdjettiń jobasyn onyń negizgi shyǵys baǵyttary boıynsha aldyn ala baǵalaý qaǵıdalaryn bekitý týraly» Jarlyǵyna ózgerister engizildi.
Anyqtalǵandaı, oblystyq bıýdjettiń, respýblıkalyq mańyzy bar qalalardyń, astananyń bıýdjet jobalaryn olardyń negizgi shyǵysy boıynsha aldyn ala baǵalaý qaǵıdalary Qazaqstan Respýblıkasynyń Bıýdjet kodeksine jáne «Memlekettik aýdıt jáne qarjylyq baqylaý týraly» Qazaqstan Respýblıkasynyń Zańyna sáıkes ázirlengen jáne oblystyń, respýblıkalyq mańyzy bar qalanyń, astananyń revızııalyq komıssııasy tarapynan jobalardy aldyn ala baǵalaý tártibin aıqyndaıdy.
Bıýdjet jobasyn baǵalaý barysynda oblystyq bıýdjet, respýblıkalyq mańyzy bar qala, astana bıýdjeti jobasynyń josparly kezeńge arnalǵan kórsetkishtiń negizdiligine, bıýdjettik jobany ázirleýge arnalǵan normatıvtik quqyqtyq jáne ádistemelik bazanyń bar bolýyna jáne jetkiliktiligine taldaý júrgizý, sondaı-aq revızııalyq komıssııa ázirlegen usynymdarymen birge bıýdjet jobasyn baǵalaý nátıjesin jergilikti atqarýshy organǵa jáne tıisti máslıhatqa joldaý kózdeledi.
Qujattar men materıaldardyń shynaıylyǵyn jáne negizdiligin rastaý qajet bolǵan jaǵdaıda revızııalyq komıssııa bıýdjet baǵdarlamalary ákimshilerine jáne bıýdjet protsesine qatysýshylarǵa qujattamany jáne aqparatty usyný týraly talap joldaıdy, sondaı-aq baǵalaý obektisinde nemese memlekettik aýdıtte ótkizilgen aýdıttik jáne saraptamalyq-taldamalyq is-sharalardyń materıaldaryn paıdalanady.
Memlekettik josparlaý jónindegi jergilikti ýákiletti organ oblystyq bıýdjet, respýblıkalyq mańyzy bar qala, astana bıýdjeti jobasyn baǵalaý qorytyndysynda kórsetilgen usynymdy oryndaý boıynsha qabyldanǵan sharalar týraly aqparatty oblystyq bıýdjet, respýblıkalyq mańyzy bar qala, astana bıýdjeti bekitilgennen keıin 30 jumys kúni ishinde revızııalyq komıssııaǵa joldaıdy.
Aıta ketsek, keshe Memleket basshysy bıýdjetti josparlaý máseleleri boıynsha jıyn ótkizdi.