Prezıdent Jarlyǵymen Kım Song Keng ІІ dárejeli «Dostyq» ordenimen marapattaldy
ASTANA.KAZINFORM - Memleket basshysy Qasym-Jomart Toqaevtyń Jarlyǵymen eldiń joǵary bilim berý salasyn damytýǵa qosqan úlesi úshin Woosong bilim berý qorynyń Qamqorshylar keńesiniń tóraǵasy Kım Song Keng ІІ dárejeli «Dostyq» ordenimen marapattaldy.
Marapatty QR Ǵylym jáne joǵary bilim mınıstri Saıasat Nurbek tabystady.
Aıta keteıik, keshe Prezıdent Woosong bilim berý qory qamqorshylar keńesiniń tóraǵasy Kım Song Kengty qabyldady. Kezdesýde Qasym-Jomart Toqaev Túrkistanda Woosong ýnıversıtetiniń álemdik bilim berý talaptaryna saı keletin fılıalyn ashqany úshin Kım Song Kengke rızashylyǵyn bildirdi.
Bıyl Túrkistan qalasynda Koreıa Respýblıkasynyń jetekshi joǵary oqý oryndarynyń biri sanalatyn Woosong University Kazakhstan ýnıversıteti ashyldy. Bul – tarıhı oqıǵa ári Qazaqstan men Koreıa Respýblıkasy arasyndaǵy bilim jáne ǵylym salasyndaǵy strategııalyq yntymaqtastyqty nyǵaıtý jolyndaǵy mańyzdy qadam.
Jańa ýnıversıtet tek bilim ordasy ǵana emes, sonymen birge halyqaralyq yntymaqtastyqtyń, ınnovatsııalardyń jáne joǵary bilikti mamandardy daıarlaýdyń ortalyǵyna aınalmaq. Bul mamandar elimizdiń zııatkerlik áleýetin qalyptastyrýǵa eleýli úles qosady.