Prezıdent Jarlyǵy: Qorǵanys mınıstrliginiń ókilettigi ózgerdi

ASTANA. KAZINFORM — Memleket basshysy Qasym-Jomart Toqaev «Qazaqstan Respýblıkasynyń memlekettik basqarý júıesin odan ári jetildirý jónindegi sharalar týraly» 2025 jylǵy 13 aqpandaǵy Jarlyqqa qol qoıdy.

— Qorǵanys mınıstrligi Ónerkásip jáne qurylys mınıstrligine keıbir saladaǵy fýnktsııalary men ókilettigin bere otyryp, qaıta qurylsyn, — delingen Jarlyq mátininde. 

— memlekettik qorǵanys tapsyrysyn qalyptastyrý, basshylyq etý jáne salaaralyq úılestirý;

— áskerı-tehnıkalyq yntymaqtastyqty júzege asyrý;

— memlekettik qorǵanys tapsyrysy sheńberinde áskerı maqsattaǵy taýarlar men ónimderge, qos maqsattaǵy taýarlar men ónimderge, áskerı maqsattaǵy jumystarǵa jáne áskerı maqsattaǵy qyzmetterge baǵa belgileý.

Osylaısha Qorǵanys mınıstrliginen beriletin fýnktsııalar men ókilettikterge sáıkes Ónerkásip jáne qurylys mınıstrligi quqyq pen mindettemelerdiń mırasqory bolyp belgilendi.

Osy oraıda Prezıdent Úkimetke de tapsyrma júktedi:

— QR Prezıdenti Ákimshiliginiń kelisimi boıynsha qaıta uıymdastyrylatyn memlekettik organdar men olarǵa vedomstvolyq baǵynysty uıymdardyń shtat sanyn qaıta bólý;

— osy Jarlyqty iske asyrý jóninde ózge de sharalar qabyldaý.
Jarlyq 2025 jyly 13 aqpanda qoldanysqa engizildi.

Aıta ketsek, 13 aqpanda Memleket basshysy Qasym-Jomart Toqaev Qazaqstan Respýblıkasynyń azamattaryn 2025 jyldyń naýryz — maýsymynda jáne qyrkúıek — jeltoqsanynda merzimdi áskerı qyzmetke kezekti shaqyrý týraly týraly Jarlyqqa qol qoıdy.