Prezıdent Japonııanyń Premer-mınıstri Sanae Takaıchımen kelissóz júrgizdi
TOKIO. KAZINFORM – Memleket basshysy Japonııanyń Premer-mınıstri Sanae Takaıchımen kelissóz júrgizip, Qazaqstan delegatsııasyna qonaqjaılyq kórsetken Sanae Takaıchıge rızashylyǵyn bildirdi. Bul týraly Aqorda málim etti.
– Bul sapar, shyn máninde, eki el arasyndaǵy qarym-qatynastyń jańa kezeńi. Biz Japonııany árqashan Azııadaǵy ýaqyt tezinen ótken senimdi seriktesimiz dep sanaımyz. Búgingi Japonııa – ǵasyrlar boıy qalyptasqan danalyq pen biregeı dástúrdi zamanaýı ınnovatsııamen úılesimdi jarastyrǵan, damyǵan memleket. Sizdiń parasatty ári myqty basshylyǵyńyzben elińizdiń halyqaralyq arenadaǵy rólin odan ári nyǵaıtatyn aýqymdy reformalar júrgizilip jatyr. Biz Japonııany alystaǵy kórshimiz, degenmen jaqyn ári senimdi dosymyz dep jıi aıtamyz. Ózara baılanystarymyzdyń tarıhy tereńde. Buǵan deıin Sizdiń elińizge tórt ret kelgen edim. Bul – meniń Prezıdent retindegi alǵashqy saparym. Qazaq-japon qarym-qatynasynyń berik ınstıtýtsıonaldyq negizi qalyptasqan. Ózińiz aıtqandaı, 2004 jyly Japonııanyń sol kezdegi Syrtqy ister mınıstri Kavagýchı hanymmen birge «Ortalyq Azııa + Japonııa» formatyna bastamashy boldyq. Syrtqy ister mınıstrleri deńgeıindegi alǵashqy kezdesý Astanada ótti. Búginde mundaı kezdesýlerdiń keńinen tanylǵany sonshalyq, iri memleketterdiń kóbi «Ortalyq Azııa plıýs» platformasyn quptaıdy. Biraq Japonııa bul dıalog alańynyń alǵashqy bastamashysy jáne negizin qalaýshy bolyp qala beredi, – dedi Qasym-Jomart Toqaev.
Aıta keteıik, Qasym-Jomart Toqaev Japonııaǵa resmı saparmen bardy. Sonymen qatar Tokıoda jalpy quny 3,7 mlrd dollardan asatyn kelisimderge qol qoıylady.
Memleket basshysy Japonııa Imperatory Narýhıtomen kezdesti. Sondaı-aq Qasym-Jomart Toqaevtyń qurmetine resmı qabyldaý ótti. Keıin Toqaev Meıdjı Djıngý ǵıbadathanasyn aralap kórdi. Sonymen qatar Qasym-Jomart Toqaev Japonııada turyp jatqan qazaqstandyqtarmen kezdesti jáne Japonııa Parlamentiniń Qazaqstanmen dostyq lıgasy múshelerimen kezdesti.
Búgin Japonııa Premer-mınıstriniń ofısinde Qasym-Jomart Toqaevty resmı qarsy alý rásimi ótti.
