Prezıdent Japonııa tájirıbesin mysalǵa alyp, ekologııa máselesine toqtaldy

ASTANA. KAZINFORM — Memleket basshysy Qasym-Jomart Toqaev Astanany damytý jónindegi keńesinde qorshaǵan ortany qorǵaý – strategııalyq másele ekenin aıtty.

— Árıne, qoǵamda joǵary ekologııalyq mádenıet qalyptasyp, turǵyndar ortaq mekenimizdiń tynys-tirshiligine belsendi aralasa bastaǵany qýantady. Dál osy sebepti «Taza Qazaqstan» jobasyn bastadym. Ony búkil el qoldady. Qorshaǵan ortany qorǵaý — strategııalyq másele. «Taza Qazaqstan» ıdeologııalyq kampanııasyna ne úshin bastamashy bolǵanymdy aıtaıyn. Óıtkeni ekologııa, turmys-tirshiliktegi tazalyq bolmysymyzdyń bir bóligine aınalýǵa tıis, — dedi Memleket basshysy.

Memleket basshysy qoqyspen kúresý kerektigin aıtty.

— Jalpy, Azııanyń birqatar qalasynda qaldyqtardy joıýdyń ekonomıkaǵa negizdelgen tásilderi qoldanylady. Shynynda da qoqyspen kúresý kerek. Tokıoda 14 mıllıon adam turady. Azǵantaı aýmaqta osynshama halyq ómir súrip jatsa da, ondaǵy tazalyq pen tártip óte joǵary deńgeıde. Mysaly, sammıtte sóılegen sózimde Japonııa Premer-mınıstrine «Elińizdiń qýaty — adamdaryńyzda. Sizder únemi úılesimdilikke úndeısizder. Japondar úırenýden jalyqpaıdy. Ózin qalaı ustaýdy biledi, ózge adamdarǵa qurmetpen qaraıdy. Úıin, páterin, ózi otyrǵan ǵımaratty taza ustaıdy. Sonymen qatar olar úzdiksiz bilim alady ári ony óskeleń urpaqqa da sińiredi» dep jyly sózimdi arnadym. Bizge de dál osyndaı mentalıtet qajet. Sondyqtan tsıfrlandyrý men jasandy ıntellektiden úlken úmit kútemin. Biz alǵa qaryshtap qadam basyp, tehnologııalyq ult bolýdyń úlgisine aınalýymyz kerek, — dedi Qasym-Jomart Toqaev. 

Aıta ketelik Toqaev Astana ákimine Smart City jobasyn tezdetip aıaqtaýdy tapsyrǵan edi.