Prezıdent janyndaǵy Sybaılas jemqorlyqqa qarsy kúres komıssııasynyń quramy ózgerdi
ASTANA. 11 mamyr. QazAqparat - QR Prezıdenti janyndaǵy Sybaılas jemqorlyqqa qarsy kúres máseleleri jónindegi komıssııanyń quramy birshama ózgerdi.
Bul týraly búgin Aqordada QR Memlekettik hatshysy Muhtar Qul-Muhammedtiń tóraǵalyǵymen ótken atalmysh komıssııa otyrysy barysynda málim boldy.
Memlekettik hatshy M. Qul-Muhammedtiń aıtýynsha, Elbasynyń naýryzdaǵy jarlyǵyna sáıkes, komıssııa quramyna Prezıdent Ákimshiligi Basshysynyń orynbasary Baǵlan Maılybaev, Parlament Senatynyń Konstıtýtsııalyq zańnama, sot júıesi jáne quqyq qorǵaý organdary komıtetiniń tóraǵasy Serik Aqylbaı engizilgen. Al komıssııanyń hatshysy bolyp Prezıdent Ákimshiligi quqyq qorǵaý bóliminiń meńgerýshisi Alık Shpekbaev bekitildi.
«Sondaı-aq, komıssııa músheleri Rashıd Túsipbekov burynǵysynsha Ádilet mınıstri retinde emes, Ekonomıkalyq qylmysqa jáne sybaılas jemqorlyqqa qarsy kúres agenttiginiń tóraǵasy retinde, al Berik Imashev Ádilet mınıstri retinde komıssııa quramyna enip, búgingi otyrysqa qatysyp otyr. Komıssııanyń jańa múshelerin Elbasynyń úlken senimimen quttyqtaımyn, jumysyna sáttilik tileımin», - dedi M. Qul-Muhammed.
