Prezıdent janyndaǵy Jasandy ıntellekt jóninde keńestiń quramynda kimder bolady
ALMATY. KAZINFORM — Almatyda ótip jatqan jasandy ıntellekt jaıynda AlmatyFair.ai kórmesine Tsıfrlyq damý, ınnovatsııalar jáne aeroǵarysh ónerkásibi mınıstri Jaslan Mádıev qatysty.
Vedomstvo basshysy is-shara barysynda Jasandy ıntellekt jóninde keńestiń quramyna kiretin sarapshylardy atap ótti.
— Prezıdent janyndaǵy jasandy ıntellekt jónindegi keńes qazir belsendi túrde qurylyp jatyr. Tıisti normatıvtik qujattar ázirlenip, Prezıdent Ákimshiligimen kelisý júrgizip jatyrmyz, sondaı-aq osy keńestiń quramyna qosylatyn sarapshylar qoǵamy iriktelip jatyr, — dedi ol.
Sondaı-aq Jaslan Mádıev JI jónindegi keńeske qosylýǵa kelisim bergen halyqaralyq sarapshylardy atady. Olardyń qatarynda jasandy ıntellekt salasyndaǵy álemdegi jetekshi mamandardyń biri Lı Kaıfý, buryn Google-da zertteý tobyn basqarǵan Pıter Norvıg, Japonııadaǵy JI salasyndaǵy tanymal sarapshy Djeıtı «Djoı» Ito bar.
Eske salaıyq, buǵan deıin Memleket basshysy tsıfrlandyrý men jasandy ıntellektini barlyq salaǵa engizý kerek ekenin aıtqan edi.