Prezıdent janyndaǵy Ulttyq qordy basqarý keńesiniń mindetteri keńeıtiledi
ASTANA. KAZINFORM — «Ulttyq ekonomıka mınıstrligi Ulttyq qordy basqarý jónindegi keńestiń keıbir máseleleri týraly» Prezıdent Jarlyǵynyń jobasyn kópshilik talqylaýyna shyǵardy.

Jańa redaktsııa boıynsha Ulttyq qor qarajatyn oblıgatsııalyq qaryzdar nysanynda paıdalaný jónindegi máseleler qaralǵan jaǵdaıda usynystar ázirleý tek jalpyhalyqtyq mańyzy bar jobalardy saraptaý nátıjeleri negizinde ǵana júzege asyrylady.
Sondaı-aq, keńestiń mindetterine jańa eki tarmaq qosylyp otyr. Olar:
- Qazaqstan Respýblıkasynyń Ulttyq qorynan respýblıkalyq bıýdjetke kepildendirilgen transferttiń mólsherin aıqyndaý jóninde usynystar ázirleý.
- Qarjylandyrýdyń balamaly kózderi bolmaǵan kezde asa mańyzdy obektiler men jalpyhalyqtyq mańyzy bar jobalardy aıqyndaý jóninde usynystar ázirleý.
Qujat Prezıdenttiń 11 Jarlyǵynyń kúshin joıýdy da kózdeıdi.
Bul ózgerister Bıýdjet kodeksi 5-baby 16-tarmaǵynyń talaptarynan týyndap otyrǵanyn aıtý kerek.
Al Ulttyq qordy basqarý jónindegi Prezıdent janyndaǵy konsýltatıvtik-keńesshi organnyń quramy ózgerissiz qalmaq. Olar:
- Qazaqstan Respýblıkasynyń Prezıdenti — Keńes tóraǵasy
- Senat tóraǵasy (kelisim boıynsha)
- Májilis tóraǵasy (kelisim boıynsha)
- Prezıdenti Ákimshiliginiń basshysy
- Ulttyq bank tóraǵasy
- Joǵary aýdıtorlyq palata tóraǵasy
- Qarjy mınıstri
- Ulttyq ekonomıka mınıstri.
Buǵan deıin Ulttyq qordan bólingen qarajattyń jumsalýyn monıtorıngteý jónindegi komıssııa jumysyn qaıta bastaǵany habarlanǵan edi.