Prezıdent janarmaıdyń naryqtyq baǵasyn 165 teńgege deıin tómendetýdi júktedi
NUR-SULTAN. QazAqparat – Qazaqstan Prezıdenti Qasym-Jomart Toqaev Úkimetke janarmaı naryqtyq baǵasyn 15 paıyzǵa arzandatýdy tapsyrdy. Bul týraly Memleket basshysy halyqqa respýblıkalyq telearnalar arqyly jasaǵan málimdemesinde aıtty, dep habarlaıdy QazAqparat tilshisi.
«Kásipkerlerge qoldaý kórsetiledi. Atap aıtqanda bıýdjetten 70 mlrd teńge bólinedi. Kóktemgi egis naýqany úshin qarapaıym zattar ekonomıkasy baǵdarlamasy arqyly qosymsha 100 mlrd teńge bólýdi tapsyramyn. Eń aldymen shaǵyn jáne orta sharýa qojalyqtaryna qoldaý kórsetken jón. Sonymen qatar Úkimetke janarmaı naryqtyq baǵasyn 15 paıyzǵa arzandatyp, 165 teńgege deıin tómendetý mindeti júkteldi. Osyny qamtamasyz etý úshin 390 myń tonna janarmaı jeńildikpen satylatyn bolady», - dedi Prezıdent.
