Toqaev jańadan taǵaıyndalǵan Ádilet mınıstrine birqatar tapsyrma berdi
ASTANA. KAZINFORM — Memleket basshysy Ádilet mınıstri Erlan Sársembaevty qabyldady, dep habarlaıdy Aqorda.
Prezıdentke ádilet organdary qyzmetiniń negizgi baǵyttary, sondaı-aq Memleket basshysynyń «Ádiletti Qazaqstan: zań men tártip, ekonomıkalyq ósim, qoǵamdyq optımızm» atty Joldaýyn júzege asyrý aıasynda belgilengen mınıstrliktiń maqsattary men mindetteri jóninde baıandaldy.
— Qasym-Jomart Toqaevqa normatıvtik aktiler ázirleý qyzmetiniń sapasyn arttyrý, zań ústemdigin qamtamasyz etý jáne ádiletti ári qaýipsiz qoǵam qalyptastyrý boıynsha atqarylyp jatqan jumystar týraly málimet berildi. Memleket basshysy quqyqtyq júıeni nyǵaıtý úderisinde azamattardyń quqy men múddesine den qoıýdyń mańyzyn atap ótti, — delingen habarlamada.
Kezdesý sońynda Prezıdent birqatar tapsyrma berdi.
Eske salsaq, 9 qańtarda Memleket basshysynyń Jarlyǵymen Erlan Sársembaev Ádilet mınıstri bolyp taǵaıyndaldy.
Osyǵan deıin Prezıdent belgili jazýshy Tólen Ábdikke jedelhat joldaǵanyn jazǵan edik.