Prezıdent jańa zańǵa qol qoıdy: qazaqstandyqtar úshin ne ózgeredi
ASTANA. KAZINFORM — Memleket basshysy tsıfrlandyrý, derbes derekterdi qorǵaý, jol qozǵalysy jáne kóliktegi ozyq tehnologııalardy retteý máseleleri boıynsha birqatar zańnamalyq aktilerge ózgerister men tolyqtyrýlar engizý týraly zańǵa qol qoıdy. Qujat tsıfrlandyrýdy odan ári damytýǵa, jol qozǵalysy qaýipsizdigin arttyrýǵa, júrgizýshilerdi daıarlaý júıesin jetildirýge, sondaı-aq kıberqaýipsizdik pen derbes derekterdi qorǵaýdy kúsheıtýge baǵyttalǵan, dep habarlaıdy Kazinform tilshisi.
Zań aıasynda Qazaqstan Respýblıkasynyń birqatar kodeksteri men zańnamalyq aktilerine ózgerister men tolyqtyrýlar engiziledi.
Qujattyń negizgi baǵyttarynyń biri - ushqyshsyz kólik pen áýe mobıldigin zańnamalyq turǵydan retteý. Atap aıtqanda, «ushqyshsyz avtokólik quraly» jáne «ushqyshsyz áýe kemesi» uǵymdary engizilip, olardy paıdalaný tártibi men qajetti ınfraqurylymdy qalyptastyrý tásilderi aıqyndalady.
Túzetýler jol ınfraqurylymyn basqarýdyń tıimdiligin arttyrýǵa, jol jóndeý jáne qurylys jumystaryn josparlaý men qarjylandyrýdyń ashyqtyǵyn qamtamasyz etýge, sondaı-aq avtomobıl joldary salasyna tsıfrlyq tehnologııalardy engizýge baǵyttalǵan.
Jol qozǵalysy qaýipsizdigin kúsheıtý úshin kólik quralyn basqarýǵa medıtsınalyq qarsy kórsetilimderi bar azamattar týraly málimetter dıagnozy jarııa etilmeı-aq ishki ister organdarynyń tsıfrlyq derekqorlaryna engiziledi. Budan bólek, jol qozǵalysy erejelerin buzýdy tirkeıtin kameralardy jedel járdem kólikteri men avtobýstarǵa ornatý josparlanyp otyr.
Sondaı-aq qujat júrgizýshilerdi daıarlaıtyn uıymdardyń qyzmetine memlekettik baqylaý engizýdi kózdeıdi. Avtomektepterdiń jumysy ruqsat berý tártibi arqyly rettelip, oqý protsesin aqparattyq júıe arqyly baqylaýǵa arnalǵan arnaıy tizilim qalyptastyrylady.
Mańyzdy nysandardyń kıberqaýipsizdigi
Túzetýlerdiń jeke bir blogy kıberqaýipsizdik pen derbes derekterdi qorǵaý máselelerine arnalǵan. Osyǵan baılanysty ulttyq qaýipsizdik organdarynyń tsıfrlandyrýdyń asa mańyzdy obektilerinde kıberqaýipsizdik talaptarynyń saqtalýyn baqylaý jónindegi ókilettikteri keńeıtiledi.
Eńbek zańnamasy qyzmetkerlerdiń kıberqaýipsizdik talaptarymen tanys bolýyn jáne saqtalýyn qamtamasyz etý úshin ishki baqylaýdy júzege asyrýdy talap etetin normalarmen tolyqtyrylyp otyr.
Sonymen qatar zańnamaǵa derbes derekterdiń ıdentıfıkatorlary, derekterdi ıesizdendirý jáne heshteý sııaqty jańa uǵymdar engiziledi. Derbes derekterdi jınaýmen jáne óńdeýmen aınalysatyn tulǵalardyń tizilimi, sondaı-aq derbes derekter qaýipsizdigi talaptarynyń buzylý faktileri tirkeletin arnaıy tizilim qurylady.
Budan bólek, qoǵamdyq qaýipsizdikti qamtamasyz etý jáne quqyq buzýshylyqtardyń aldyn alý maqsatynda Ulttyq beınemonıtorıng júıesi engiziledi.
Zań memlekettik qaıyrymdylyq tsıfrlyq platformasyn jáne qaıyrymdylyq uıymdarynyń tizilimin qurýdy da qarastyrady. Sonymen qatar kóshi-qon qaýipsizdigin kúsheıtýge jáne memlekettik shekaranyń tsıfrlyq júıelerin qorǵaýǵa baǵyttalǵan qosymsha sharalar engiziledi.
Buǵan deıin Qazaqstanda jańa zaýyttarǵa beriletin memlekettik qoldaý tártibi ózgeretini týraly jarııaladyq.
