Memleket basshysy jańa Salyq kodeksine qol qoıdy

ASTANA. KAZINFORM —  Memleket basshysy jańa Salyq kodeksine jáne «Qazaqstan Respýblıkasynyń keıbir zańnamalyq aktilerine salyq salý máseleleri boıynsha ózgerister men tolyqtyrýlar engizý týraly» Zańǵa qol qoıdy, dep habarlaıdy Aqordanyń baspasóz qyzmeti.

Salyq kodeksi salyqtyq ákimshilendirýdi jappaı jeńildetýdi kózdeıdi. Atap aıtqanda, salyq eseptiliginiń kólemi 30 paıyzǵa qysqarady, salyqtardyń sany 20 paıyzǵa azaıady, jeńildikter men alymdar ońtaılandyrylady. Eleýli ózgerister korporatıvtik jáne jeke tabys salyqtarynan bastap ınvestıtsııalardy yntalandyrý jáne salyq júktemesin qaıta bólý sekildi barlyq negizgi baǵytty qamtıdy.

Qosylǵan qun salyǵynyń (QQS) jańa bazalyq mólsherlemesi 16 paıyz bolyp bekitildi. Dári-dármek pen medıtsınalyq qyzmetterge tómendetilgen QQS mólsherlemesi belgilendi: 2026 jyldan — 5 paıyz, 2027 jyldan — 10 paıyz. Bul rette Tegin medıtsınalyq kómektiń kepildik berilgen kólemi (TMKKK) men Mindetti áleýmettik medıtsınalyq saqtandyrý (MÁMS) aıasyndaǵy qyzmetter, Úkimet aıqyndaıtyn tizbe boıynsha orfandyq jáne áleýmettik máni bar aýrýlardy emdeý, sondaı-aq baspa túrindegi kitap shyǵarý, arheologııalyq jumys júrgizý qyzmetteri QQS-tan bosatylady. Merzimdi baspa basylymdardy ótkizý boıynsha 10 paıyz deńgeıinde tómendetilgen QQS mólsherlemesi belgilenedi.

QQS boıynsha mindetti esepke qoıý úshin aınalymnyń tómengi shegi 10 myń aılyq eseptik kórsetkishke (40 mıllıon teńge) deıin tómendetiledi. Biryńǵaı zeınetaqy jınaqtaýshy qorynan (BZJQ) tólenetin zeınetaqy tólemderi jeke tabys salyǵynan (JTS) bosatylady. Paıdalanylý merzimi 10 jyldan joǵary avtomobılder úshin kólik quraly salyǵy tómendetildi.

Múgedektigi bar adamdarǵa áleýmettik salyqtyq shegerimder 882-den 5000 AEK-ke deıin ulǵaıtyldy.

Salyqtardyń sany azaıdy: biryńǵaı jer salyǵy qysqartyldy, jeke tólemaqylar boıynsha mólsherlemeler men alymdardyń sany kemitildi. Arnaýly salyq rejımderi ońtaılandyryldy. Endi olar úsh jaǵdaıda qoldanylady: ózin-ózi jumyspen qamtyǵandar úshin, ońaılatylǵan deklaratsııa negizinde jáne sharýa qojalyqtary úshin. Ózin-ózi jumyspen qamtyǵandar tólemderdi mobıldik qosymsha arqyly eseptep, tóleı alady. 

Korporatıvtik tabys salyǵy (KTS) 20 paıyz deńgeıinde saqtalady. Alaıda saralanǵan salyqtyq mólsherleme engiziledi. Atap aıtqanda, bankter (bıznes sýbektilerin kredıtteýdi qospaǵanda) men oıyn bıznesi úshin — 25 paıyz. Áleýmettik sala uıymdary úshin 2026 jyly 5 paıyz mólsherinde belgilenip, 2027 jyly 10 paıyzǵa deıin ulǵaıady.

Aýyl sharýashylyǵy taýaryn óndirýshilerge 3 paıyz jeńildetilgen mólsherleme qalady. Qor naryǵyn yntalandyrý úshin bırjalyq qundy qaǵazdarǵa tólenetin dıvıdentterge salyq jeńildikteri sol kúıi saqtalady.

«Báıterek» holdıngi shyǵarǵan qundy qaǵazdardan túsetin kiris 2031 jylǵa deıin KTS-ten bosatylady.

Paıdaly qazbalardy óńdeý men geologııalyq barlaý salasy úshin qosymsha preferentsııalar qarastyrylǵan. Atap aıtqanda, tıimdiligi tómen jańa ýchaskeler 5 jylǵa paıdaly qazbalardy óndirý salyǵynan bosatylady.

Jeke tabys salyǵynyń (JTS) progressıvti mólsherlemesi engiziledi. Jyldyq jalpy tabysy 8500 aılyq eseptik kórsetkishten asatyn azamattarǵa 15 paıyz salyq mólsherlemesi qoldanylady. Sol sııaqty dıvıdentteri men tabys kólemi jylyna 230 myń AEK-ten asatyn kásipkerler osyndaı mólsherde salyq tóleıdi. Al fermerlerdiń osy mejeden asatyn tabysyna burynnan saqtalǵan 70 paıyz jeńildikti esepke ala otyryp, 4,5 paıyz salyq salynady.

Jeke tulǵalar úshin qymbat ónimderge, atap aıtqanda quny 75 mıllıon teńgeden asatyn avtokólikterge, quny 100 mıllıon teńgeden asatyn kemelerge, ár lıtriniń quny 500 myń teńgeden asatyn alkogolge, ár danasynyń quny 10 myń teńgeden asatyn temeki ónimderine 10 paıyz aktsız túrinde salyq salynady. 

Sonymen qatar jalpy quny 450 mıllıon teńgeden asatyn jyljymaıtyn múlik nysandaryna múlik salyǵy joǵarylaıdy.

Salyqtyq ákimshilendirý tásilderi aıtarlyqtaı ózgeredi. Kameraldyq baqylaý eskertý sıpatynda bolady. Salyqtyq bereshekti óndirip alý, tólemdi keıinge qaldyrý jáne bólip tóleý múmkindigin berý protsedýralary jeńildetiledi. Salyq bereshegi az bolsa, bıznestiń esepshottary buǵattalmaıdy. Qaryz somasyna qaraı eskertý jáne basqa da sharalar kezeń-kezeńimen qoldanylady.

Aıta keteıik, kodeks 2026 jylǵy 1 qańtardan bastap kúshine enedi. Kodekstiń mátini baspasózde jarııalanady.

Buǵan deıin Prezıdent QR UQK sybaılas jemqorlyqqa qarsy is-qımyl qyzmeti týraly erejeni bekitkenin jazǵanbyz.