Prezıdent jańa Konstıtýtsııany iske asyrý jóninde jumys keńesin ótkizdi

ASTANA. KAZINFORM — Memleket basshysy Qasym-Jomart Toqaevtyń tóraǵalyǵymen bıyl 15 naýryzda respýblıkalyq referendýmda qabyldanǵan Qazaqstan Respýblıkasynyń Konstıtýtsııasyn iske asyrý máselesi jóninde jumys keńesi ótti, dep habarlaıdy Aqordanyń baspasóz qyzmeti.

Keńeske Parlament Senatynyń Tóraǵasy Máýlen Áshimbaev, Parlament Májilisiniń Tóraǵasy Erlan Qoshanov, Premer-mınıstr Oljas Bektenov, Memlekettik keńesshi Erlan Qarın, Prezıdent Ákimshiliginiń basshysy Aıbek Dádebaı, Prezıdenttiń quqyqtyq máseleler jónindegi kómekshisi Erjan Jıenbaev jáne Ádilet mınıstri Erlan Sársembaev qatysty.

Prezıdent búgin «2026 jylǵy 15 naýryzda qabyldanǵan Qazaqstan Respýblıkasynyń Konstıtýtsııasyn iske asyrý jónindegi sharalar týraly» Jarlyqqa qol qoıǵanyn atap ótti.

Memleket basshysy alda zańdar men ózge de normatıvtik-quqyqtyq aktilerdiń erejelerin jańa Konstıtýtsııaǵa sáıkestendirý boıynsha aýqymdy jumys turǵanyn aıtty.

— Qasym-Jomart Toqaev, eń aldymen, jańa Konstıtýtsııaǵa sáıkes bılik ınstıtýttarynyń qyzmetin aıqyndaıtyn zańdardy túzeý qajettiligine nazar aýdardy. Jalpy, alty konstıtýtsııalyq zań jáne ózge zańnamalyq aktilerge ózgerister men tolyqtyrýlar engizý jóninde úsh zań qabyldaý qajet. Konstıtýtsııa kúshine enetin kúndi eskere otyryp, tıisti zańdardy Parlament sessııasy aıaqtalǵanǵa deıin qabyldaý kerek, — delingen habarlamada.

Memleket basshysy zańdardy sapaly ári ýaqtyly ázirlep, qabyldaýdy tapsyrdy. Sondaı-aq Úkimet zańǵa táýeldi normatıvtik-quqyqtyq aktilerdi keshiktirmeı túzeýge tıis. 

Eske salsaq, buǵan deıin Prezıdent Konstıtýtsııany qabyldaýǵa arnalǵan saltanatty jıynǵa qatysqanyn jazǵanbyz.