Prezıdent: Jańa Konstıtýtsııa jobasy adam quqyqtary men bostandyqtaryn qorǵaýdy eń joǵary deńgeıge kóteredi

ASTANA. KAZINFORM – Jańa Konstıtýtsııa jobasy adam quqyqtary men bostandyqtaryn qorǵaýdy eń joǵary deńgeıge kóteredi. ıAǵnı adam dúnıe esigin ashqannan bastap, onyń bastaýysh jáne orta bilim alýy, otbasyn qurýy jáne kámeletke tolǵan balalardyń eńbekke jaramsyz ata-anasyna qamqorlyq jasaý mindeti Negizgi zańda túgel qamtylǵan. Bul týraly Memleket basshysy Qasym-Jomart Toqaevtyń qatysýymen barlyq deńgeıdegi máslıhat depýtattarynyń ІІІ respýblıkalyq forýmynda aıtty. 

— Ata zań jobasy — azamattarmen adamı qarym-qatynas túzýdiń jarqyn kórinisi. Kúni keshe ǵana keıbir normalar áleýmettik qııal sııaqty kóringen edi. Mysaly, qazirgi Konstıtýtsııada azamattyń memleketke keltiretin zııany jóninde jazylǵan, al jańa Ata zań jobasynda adamǵa zııan keltirgeni úshin memleketke júkteletin jaýapkershilik týraly norma paıda boldy. Budan bylaı ár adam memlekettik organnyń nemese laýazymdy tulǵanyń zańsyz áreketi arqyly keltirilgen zııandy memleketten ótep alýǵa quqyǵy bar, — dedi Prezıdent.

Memleket basshysynyń aıtýynsha, «Memleket Konstıtýtsııasy adam konstıtýtsııasyn buzbaıtyndaı bolýǵa tıis» degen ulaǵatty sóz Qazaqstan azamattarynyń quqyqtary men bostandyqtaryn, múddelerin qorǵaýdyń jańa tásilderin dál sıpattaıdy.

— Zań men tártip ústemdigine memlekettik ıdeologııa retinde basymdyq berilgenin taǵy da atap ótkim keledi. Bul qaǵıdatty tolyq túsinbesek jáne ulttyq sanamyzǵa sińirmesek, qazaq memlekettiginiń nyǵaıýy týraly aıtýdyń ózi artyq, — dedi ol.

Memleket basshysy Qasym-Jomart Toqaev barlyq deńgeıdegi máslıhat depýtattarynyń ІІІ respýblıkalyq forýmynda Konstıtýtsııa mátinimen jumys istegen barsha azamatqa alǵys aıtty.