Prezıdent: Jańa Konstıtýtsııa — jastarǵa ómirde baǵyt-baǵdar silteıtin temirqazyq ispettes
ASTANA. KAZINFORM – Qasym-Jomart Toqaev qazirgi konstıtýtsııalyq reformany Ata zańǵa 2022 jyly engizilgen ózgeristerden bólip qaraýǵa bolmaıtynyn aıtty.
— Jańa Konstıtýtsııanyń mazmuny shyn máninde halyqtyq sıpatqa ıe. Bul mańyzdy qujat jurtymyzǵa, ásirese, óskeleń urpaq pen jastardyń ıgiligine qyzmet etedi.
Jańa Konstıtýtsııa — jastarǵa ómirde baǵyt-baǵdar silteıtin temirqazyq ispettes. Óıtkeni ózgeristerge toly jańa dáýirde eldiń de, jerdiń ıesi, qorǵany — jastar. Sondyqtan bul qujatty Qazaqstannyń aldaǵy onjyldyqtardaǵy ornyqty damýyna negiz qalaıtyn saıası tuǵyry desek, qatelespeımiz, — dedi Prezıdent.
Memleket basshysy qazirgi konstıtýtsııalyq reforma qoǵam suranysyna saı keletinin aıtty.
— Qazirgi konstıtýtsııalyq reformany Ata zańymyzǵa 2022 jyly engizilgen ózgeristerden bólip qaraýǵa bolmaıdy. Ol kezde bas qujattyń úshten biri jańartyldy. Bizge sol ýaqyttyń ózinde jańa Konstıtýtsııa qabyldaýǵa bolar edi. Osyndaı usynys kóptegen qoǵamdyq alańda, sarapshylar ortasynda aıtyldy.
Degenmen birqatar saıası jańashyldyqty júzege asyryp, sodan keıin ǵana elimizdiń konstıtýtsııalyq negizderin birtindep ózgertýge kirisý jóninde sheshim qabyldandy. Jasyratyn eshteńesi joq, bul meniń sheshim.
Qazirgi konstıtýtsııalyq reforma qoǵam suranysyna saı keledi, sondyqtan halyqtyq sıpatqa ıe boldy. Áýeli kún tártibine parlamenttik reforma máselesi ǵana qoıylǵan edi. Alaıda qoǵamdyq talqylaýlar bul bastamanyń aıasynan shyǵyp ketti, — dedi ol.
Ol azamattardan tórt myńǵa jýyq usynys túskenin aıtty.
— Azamattardan tórt myńǵa jýyq usynys tústi. Onyń 15 paıyzǵa jýyǵy Parlamenttiń qyzmetine qatysty, al qalǵany aýqymdy konstıtýtsııalyq reformanyń túrli aspektisin qamtydy. Nátıjesinde konstıtýtsııalyq komıssııaǵa kelip túsken ótinishterdiń sany on eki myńǵa jetti.
Negizgi zańnyń jobasyna qatysty talqylaýlar jarty jyldan astam ýaqytqa sozyldy. Buqaralyq aqparat quraldarynda keńinen jarııalandy.
Jalpy, bul úderiske búkil qoǵam bilek sybanyp kiristi. Azamattarymyz eGov jáne eOtinish platformalarynda oılaryn ortaǵa saldy. Komıssııa otyrystaryn áleýmettik jeliler arqyly tikeleı efırde kórgender sany mıllıonnan asty, — dedi Qasym-Jomart Toqvaev.
Aıta ketelik Prezıdent qatysýymen máslıhat depýtattarynyń ІІІ respýblıkalyq forýmy ótip jatyr.
