Prezıdent jańa ekonomıkalyq baǵyttyń 7 qaǵıdatyn atady
«Uzaqqa sozylǵan munaı sýpertsıkli aıaqtalǵan tárizdi. Endi álemdik naryqtyń túbegeıli jańa konıýktýrasyna daıyn bolý kerek. Naǵyz ártaraptandyrylǵan tehnologııalyq ekonomıka qurý – biz úshin jaı ǵana qajettilik emes, balamasy joq jalǵyz jol», - dedi Prezıdent halyqqa arnlaǵan Joldaýynda.
Bul rette Prezıdent ekonomıkanyń halyqtyń ál-aýqatyn arttyrý úshin jumys isteýi qajettigin atap ótti.
«Ulttyq tabystyń ósýinen túsken paıdany ádil bólýge, tıimdi áleýmettik lıftilerge degen qoǵamdyq suranystyń artýy mindetti túrde oń jaýap tabýy qajet. Sondyqtan elimizdiń jańa ekonomıkalyq baǵyty 7 basty qaǵıdatqa negizdelýi tıis.
Birinshi – ıgilikter men mindettemelerdi ádil bólý.
Ekinshi – jeke kásipkerliktiń jetekshi róli.
Úshinshi – adal básekelestik, kásipkerlerdiń jańa býyny úshin naryqty ashý.
Tórtinshi – ónimdilikti arttyrý, ekonomıkanyń kúrdeliligi men tehnologııalylyǵyn arttyrý.
Besinshi – adamı kapıtaldy damytý,bilim berýdiń jańa túrin ınvestıtsııalaý.
Altynshy – ekonomıkany «jasyldandyrý», qorshaǵan ortany qorǵaý.
Jetinshi – memlekettiń dáıekti, qısyndy sheshimder qabyldaýy jáne olar úshin qoǵam aldyndaǵy jaýapkershiligi.
Bul rette biz ózimizdiń básekelik artyqshylyqtarymyz ben naqty múmkindikterimizge súıenýimiz qajet», - dedi Qasym-Jomart Toqaev.
