Prezıdent jambyldyqtarǵa el damýyna qosqan úlesi úshin alǵys aıtty
TARAZ. KAZINFORM — Memleket basshysy jambyldyqtarmen kezdesý barysynda «Áýlıeata – naǵyz eńbekqor adamdardyń mekeni» ekenin atap ótti. Bul týraly Aqordanyń baspasóz qyzmeti habarlady.
Prezıdent «Jumysshy mamandyqtary jyly» aıasynda eńbek adamdaryna aıryqsha qurmet kórsetý dástúri jalǵasyn tabatynyn aıtty.
— Ózderińiz bilesizder, bıyl bir el bolyp «Jumysshy mamandyqtary jylyn» atap óttik. Jyl boıy eńbek adamdaryna aıryqsha qurmet kórsettik. Osy jaqsy dástúr aldaǵy ýaqytta da jalǵasyn tabady. Óz isine jaýapkershilikpen qarap, qyzmetin minsiz atqarǵan adam qashanda qadirli bolady. Men muny únemi aıtyp júrmin. Bul turǵydan alǵanda, Jambyl jurtynyń el damýyna qosqan úlesi mol, eńbegi eren ekeni belgili. Áýlıeata — naǵyz eńbekqor adamdardyń mekeni. Qazir ortamyzda jumysyn adal atqaryp, halqymyzǵa aıanbaı qyzmet etip júrgen azamattar otyr. Barshańyzǵa shynaıy rızashylyǵymdy bildiremin, — dedi Toqaev.
Osyǵan deıin Jambyl oblysynda jumys saparymen júrgen Memleket basshysy Qasym-Jomart Toqaev Dala Glass áınek óndiretin kásiporyn qyzmetimen tanysty.
Buǵan qosa Qasym-Jomart Toqaev Baýyrjan Momyshulyna «Halyq qaharmany» ataǵyn berý týraly sheshim qabyldaǵanyn málimdedi.
Sondaı-aq Prezıdent erekshe kútimdi qajet etetin balalar máselesine nazar aýdardy.