Prezıdent Jambyl oblysyndaǵy farmatsevtıkalyq kásiporyndardyń qyzmetimen tanysty
TARAZ. KAZINFORM — Qasym-Jomart Toqaevtyń Jambyl oblysyna jumys sapary «Ámir jáne D» jaýapkershiligi shekteýli seriktestiginiń qyzmetimen tanysýdan bastaldy. Bul týraly Aqordanyń baspasóz qyzmeti habarlady.
Kásiporyn medıtsınalyq buıymdar men dárilik zattar óndiredi.
Prezıdentke medıtsınalyq preparattar men daıyn ónim túrlerin shyǵaratyn negizgi tsehtyń jumysy kórsetildi.
«Ámir jáne D» JShS-i áleýmettik mańyzy bar aýrýlardy dıagnostıkalaýǵa arnalǵan jedel testilerdiń kóptegen túrin shyǵarady. Bul ónimder V jáne S gepatıtin, VICh-ınfektsııasyn, mıokard talmasyn, sondaı-aq esirtki jáne psıhotropty zattardy anyqtaı alady.
Kásiporynǵa tıesili medıtsınalyq buıymdardyń 200-den asa ataýly túri bar. Búginde seriktestikte 94 qyzmetker eńbek etedi.
Memleket basshysyna «Super-pharm» farmatsevtıkalyq kompanııasynyń jumysy týraly aqparat berildi.
Bul — elimizde medıtsınalyq buıymdar óndiretin jetekshi kásiporyndardyń biri. Zaýytta 600-den asa eńbekker jumys isteıdi.
Kompanııa otandyq naryqtaǵy bir rettik qoldanýǵa arnalǵan medıtsınalyq buıymdarǵa suranystyń 30 paıyzyn qamtamasyz etedi.
Atap aıtqanda, kásiporyn túrli operatsııalar úshin hırýrgııalyq jáne protsedýralyq jıyntyqtardy, medıtsınalyq betperdeniń barlyq túrin, birrettik qorǵanysh kıimin, sanıtarlyq-gıgıenalyq maqsattaǵy buıymdardy óndiredi. Sonymen qatar medıtsınalyq shprıtster, ınfýzıondy jáne qandy qaıta quıýǵa arnalǵan sıstema quraldary, basqa da ónimder daıyndalady.
Prezıdent otandyq farmatsevtıka ındýstrııasynyń damýy ımportqa táýeldilikti tómendetip, ulttyq densaýlyq saqtaý júıesin nyǵaıtýda mańyzdy ekenin atap ótti.
Aıta ketelik Memleket basshysy Jambyl oblysyna jumys saparymen barǵan edi.