Prezıdent Jambyl oblysynda jańa zaýyttyń ashylýyna onlaın qatysty
ASTANA. KAZINFORM – Prezıdent Qasym-Jomart Toqaev Qytaıdaǵy resmı sapary aıasynda QHR Memlekettik keńesiniń birinshi vıtse-premeri Dın Sıýesıanmen birge beınebaılanys arqyly Jambyl oblysynda jel generatorlaryna arnalǵan qosalqy bólshekter shyǵaratyn zaýyttyń alǵashqy keshenin saltanatty túrde iske qosty.
Atalǵan joba – «Samuryq-Qazyna» ulttyq ál-aýqat qory men SANY Renewable Energy kompanııasynyń tabysty seriktestiginiń nátıjesi. Bul jel energetıkasyna arnalǵan qondyrǵylar shyǵaratyn álemdegi eń iri kompanııanyń elimizde ashqan birinshi kásiporny.
Óndiristik baza Shý qalasyndaǵy «Jibek joly» arnaıy ekonomıkalyq aımaǵynda ornalasqan. Kásiporyn gondola, kúpshek, munara sııaqty jel elektr stansasyna qajet bólshekterdi shyǵarady. Jobany júzege asyrý elimizdegi jańa elektr stansalarynyń qurylysyn qamtamasyz etip, «jasyl» energetıkanyń damýyna zor úles qosady.
Aıta keteıik, Qazaqstan-Qytaı Іskerlik keńesinde 70-ten asa kommertsııalyq qujatqa qol qoıyldy.