Prezıdent jalpyhalyqtyq referendým ótetin ýaqytqa qatysty túsinik berdi

QYZYLORDA. KAZINFORM — Jańa Konstıtýtsııa qabyldaýmen para-par qadam jasaǵaly turmyz. Bul týraly Ulttyq quryltaıdyń V otyrysynda Memleket basshysy Qasym-Jomart Toqaev málim etti.

— Jalpy, bastapqyda Parlamenttik reforma aıasynda Ata zańnyń 40-qa jýyq babyn ózgertý josparlanǵan edi. Alaıda jumys barysynda túzetýler sany áldeqaıda kóp ekeni belgili boldy. 2022 jylǵy reformada Ata zańnyń 33 baby jańarǵanyn bilesizder. Al, endigi ózgerister odan da aýqymdy. Biz, shyn máninde, jańa Konstıtýtsııa qabyldaýmen para-par qadam jasaǵaly turmyz. Sondyqtan men Konstıtýtsııalyq komıssııa qurý týraly sheshim qabyldadym. Arnaıy Jarlyqqa erteń qol qoıamyn, — dedi Qasym-Jomart Toqaev.

Osy oraıda Prezıdent Komıssııa quramyna 100-den astam azamat kiretinin aıtty.

— Onyń ishinde Ulttyq quryltaı músheleri, belgili zańgerler, aqparat quraldary basshylary, aımaqtyq máslıhat tóraǵalary men qoǵamdyq keńes ókilderi jáne basqa da bilikti mamandar bolady. Bul jumysqa Konstıtýtsııalyq sottyń tóraǵasy jetekshilik etedi. Komıssııa barlyq usynysty saraptap, qorytyp, naqty ózgeristerdiń jobasyn ázirleıdi. Sodan soń jalpyhalyqtyq referendým ótetin ýaqytty belgileımiz, — dedi Memleket basshysy.

Budan buryn Prezıdent aldaǵy reformaǵa qatysty pikir aıtty.