Prezıdent: jahandyq úderisterde Ortalyq Azııanyń róli aıqyn ári salmaqtyraq
ASTANA. KAZINFORM – Prezıdent Qasym-Jomart Toqaev Ortalyq Azııa jáne Ázerbaıjan memleketteri basshylarynyń beıresmı Konsýltatıvtik kezdesýinde jahandyq úderisterde Ortalyq Azııanyń róli senimdi túrde artyp, álemdik arenadaǵy aımaqtyń úni aıqyn ári salmaqtyraq shyǵa bastady dep sanaıtynyn jetkizdi. Bul týraly Aqorda habarlady.
– Buǵan Qyrǵyzstannyń Birikken Ulttar Uıymy Qaýipsizdik Keńesiniń turaqty emes múshesi retinde saılanýy (2027-2028 jyldarǵa) jarqyn mysal bola alady. Oraıly sátti paıdalana otyryp Qyrǵyz Prezıdenti qurmetti Sadyr Nurǵojauly Japarovty jáne barsha qyrǵyz halqyn osy tarıhı jetistikpen quttyqtaımyn, – dedi Prezıdent.
Memleket basshysy yqpaldastyqtyń barlyq negizgi máselesi byltyr Tashkentte ótken kezdesýde egjeı-tegjeıli talqylanǵanyn atap ótti.
– Sol kezde aıtylǵan bastamalar, sonyń ishinde Konsýltatıvtik kezdesýlerdi ınstıtýtsıonaldyq turǵydan damytý máselesi áli de ózekti jáne ony iske asyrý maqsatynda birlese jumys isteýimiz qajet. Qazaqstan qol jetkizgen kelisimderge yntaly, elderimiz arasyndaǵy dostyq, tatý kórshilik jáne strategııalyq seriktestikti nyǵaıtýǵa baǵyttalǵan jasampaz bastamalardy odan ári ilgeriletýdi kózdeıdi. Birlesken kúsh-jiger arqyly ortaq progress jolynda budan da bıik belesterdi baǵyndyratynymyzǵa senimdimin. Sóz sońynda túrikmen dos-baýyrlarymyzǵa Konsýltatıvtik kezdesýler formatyndaǵy aldaǵy is-sharalardy ótkizýde tabys tileımin, – dedi Qasym-Jomart Toqaev.
Jıynda Qyrǵyzstan Prezıdenti Sadyr Japarov, Ázerbaıjan Prezıdenti Ilham Álıev, Tájikstan Prezıdenti Emomalı Rahmon, Túrikmenstan Prezıdenti Serdar Berdimuhamedov jáne Ózbekstan Prezıdenti Shavkat Mırzıeev sóz sóıledi.
Prezıdent Qasym-Jomart Toqaev Ortalyq Azııa jáne Ázerbaıjan memleketteri basshylarynyń beıresmı Konsýltatıvtik kezdesýine qatysqanyn jazǵan edik.
