Prezıdent: Jahandyq ekonomıkadaǵy ahýal turaqsyz sıpat ala bastady, kez kelgen jaǵdaıǵa daıyn bolý qajet
ASTANA. KAZINFORM — Prezıdent Qasym-Jomart Toqaevtyń tóraǵalyǵymen Qazaqstan Respýblıkasy Qaýipsizdik Keńesiniń jumys otyrysy ótti. Bul týraly Aqorda málim etti.
Jıynda tarıftik qaqtyǵystar saldarynan álemdik naryqtaǵy jaǵdaıdyń ózgerýine baılanysty elimizdiń is-qımyl jospary talqylandy.
Premer-mınıstr Oljas Bektenovtiń, Ulttyq bank tóraǵasy Tımýr Súleımenovtiń, sondaı-aq basqa da quzyretti organdar basshylarynyń baıandamalary tyńdaldy.
Prezıdent qazirgi jahandyq ekonomıkadaǵy ahýaldyń turaqsyz sıpat ala bastaǵanyn, sondyqtan kez kelgen jaǵdaıǵa daıyn bolý qajet ekenin atap ótti.
Keńes otyrysynda Qasym-Jomart Toqaev aldaǵy jumystyń negizgi baǵyttaryn aıqyndady.
– Úkimettiń mindeti – halyqtyń ál-aýqatyn, ekonomıkalyq ósim qarqynyn jáne tartylatyn ınvestıtsııa kólemin tómendetýge jol bermeý, – dedi Memleket basshysy.
Prezıdent álemdik deńgeıdegi daǵdarystar árdaıym syn-qaterge toly bolǵanymen, damýdyń jańa kókjıegin ashatynyn da aıtty.
Memleket basshysy Qazaqstannyń ekonomıkalyq, kólik-logıstıkalyq jáne adamı áleýetin nyǵaıtýǵa yqpal etetin naqty strategııalyq baǵyttardy atady.
Іri ınfraqurylymdyq jobalar men tsıfrlandyrý jospary elimizdiń ekonomıkalyq saıasatynyń basty baǵyttary bolyp qala beredi.
– Halyq aldyndaǵy negizgi áleýmettik mindettemelerdiń bárin oryndaýǵa jáne mańyzdy ınfraqurylymdyq jobalardy júzege asyrýdy jalǵastyrýǵa tıispiz, – dedi Prezıdent.
Memlekettiń qarjylyq turaqtylyǵyn saqtaý men aqsha-nesıe saıasatyn iske asyrý tetikterin jetildirýge erekshe nazar aýdaryldy.
Jıyn sońynda Prezıdent memlekettik organdarǵa birqatar naqty tapsyrma berdi.
Buǵan deıin habarlanǵandaı, Prezıdent legıonerlerdi bıýdjetten qarjylandyrýǵa tyıym salatyn zańǵa qol qoıdy.
