Prezıdent zeınetaqy júıesin jáne kóshi-qon saıasatyn jetildirýdi tapsyrdy

ASTANA. KAZINFORM —  Memleket basshysy Eńbek jáne halyqty áleýmettik qorǵaý mınıstri Svetlana Jaqypovany qabyldady. Bul týraly Aqordanyń baspasóz qyzmeti habarlady. 

Prezıdentke eńbek jáne áleýmettik qorǵaý salasyndaǵy memlekettik saıasattyń basty baǵyttaryn júzege asyrý barysy jóninde baıandaldy.

Svetlana Jaqypova halyqty jumyspen qamtý sharalary týraly aıtty.

Búgingi tańda azamattardy jumyspen qamtý boıynsha 2029 jylǵa deıingi jospardyń 83 paıyzy oryndalǵan. Sońǵy bes jylda 2,7 mıllıon adam eńbekke tartyldy. Sapaly jumys oryndaryn kóptep ashý úshin óńirlik jol kartasy men jyl saıynǵy KPI iske asyrylýda.

Bıylǵy 10 aıda ataýly áleýmettik kómek alýshylardyń sany 30 paıyzǵa azaıǵany jaıynda aqparat berdi.

Nátıjesinde resýrstardy shyn máninde muqtaj jandarǵa qaıta bólý múmkindigi paıda boldy. Qazirgi kezde mundaı kómek túrin 285,1 myń adam aldy. Bul maqsatqa 27,1 mıllıard teńge jumsalady.

Óndiristik jaraqat alý 6,5 paıyzǵa, al kisi ólimine ákelip soǵatyn qaıǵyly oqıǵalar 4,5 paıyzǵa azaıǵanyn málimdedi.

Usynylǵan derekke sáıkes, Áleýmettik qyzmetter portaly arqyly 522 myńnan astam adamǵa qyzmet kórsetilgen, 27 myń azamat ınvataksı kómegine júgingen.

Bıyl bazalyq zeınetaqy mólsheri eń tómengi kúnkóris deńgeıiniń 70 paıyzyna deıin ulǵaıtylǵanyn jetkizdi.

Jyl saıyn ınflıatsııa deńgeıine sáıkes ındeksatsııalaý júrgiziledi.

Jumys berýshi tarapynan tólenetin mindetti zeınetaqy jarnasynyń mólsherlemesi kezeń-kezeńimen ósip, 2028 jylǵa qaraı 5 paıyzǵa jetedi. Jumyspen qamtylǵan halyqtyń 65 paıyzy jınaqtaýshy zeınetaqy qorynyń salymshylary sanalady.

Memleket basshysynyń Qazaqstan halqyna arnaǵan Joldaýynda aıtylǵan tapsyrmalarynyń oryndalý barysy jóninde baıandady.

Mınıstrlik memlekettik qyzmet kórsetýge arnalǵan Biryńǵaı tsıfrlyq platforma qurý boıynsha belsendi jumys júrgizip jatyr. Bul muqtaj azamattarǵa naqty kómek kórsetýge jáne qoldaý sharalarynyń tıimdiligin arttyrýǵa yqpal etedi.

Memleket basshysy jumyspen qamtý sapasyn jaqsartýǵa, áleýmettik qoldaý tetikterin odan ári tsıfrlandyrýǵa, eńbek qatynastaryndaǵy qaýip-qaterlerdiń aldyn alý sharalaryn kúsheıtýge, zeınetaqy júıesin jáne kóshi-qon saıasatyn jetildirýge baǵyttalǵan birqatar tapsyrma berdi. 

Aıta ketelik Memleket basshysy áskerı jáne quqyqtyq tártip máseleleri boıynsha keńes ótkizgen edi.