Prezıdent: zerdeli ári zııatker urpaq tárbıeleý — barshaǵa ortaq paryz

ASTANA.KAZINFORM — Bul týraly Memleket basshysy Qasym-Jomart Toqaev ǵalymdardy marapattaý rásiminde aıtty. 

Prezıdent zerdeli ári zııatker urpaq tárbıeleýge memleket te, ata-analar da birdeı jaýapty ekenin aıtty.

— Ǵylymdy qoldaý, ǵalymdarǵa el bolyp qurmet kórsetý, bul — eń aldymen qoǵamda eńbekqorlyq, bilimpazdyq, jasampazdyq qundylyqtaryn ornyqtyrý degen sóz.

Halqymyzdyń oıy ozyq bolsa, óskeleń urpaqtyń da ǵylym-bilimge degen yqylasy aıryqsha bolary anyq. Zerdeli ári zııatker urpaq tárbıeleý — barshaǵa ortaq paryz. Oǵan memleket te, ata-analar da birdeı jaýapty.

Men byltyr «Keleshek» biryńǵaı jınaqtaý júıesin qurý týraly tıisti Zańǵa qol qoıdym. Bul júıe arqyly ata-analar balasynyń bolashaqta sapaly bilim alýyna qarajat jınaı alady.

Qazirdiń ózinde 200 myńǵa jýyq azamat arnaıy esepshot ashty. Muny bolashaqqa salynǵan eń utymdy ınvestıtsııa deýge bolady, — dedi Prezıdent.

Aıta ketelik Memleket basshysy Qasym-Jomart Toqaev ǵalymdardy marapattaý rásiminde sóz sóıledi.