Prezıdent: Zaıyrly bolý — ult bolmysynan attaý nemese qundylyqtardy umytý emes
ASTANA. KAZINFORM — Memleket basshysy Qasym-Jomart Toqaev medıtsına qyzmetkeri kúnine arnalǵan saltanatty is-sharada qoǵamdyq oryndarda ádep saqtaý máselesin kóterdi.
Óz sózinde Prezıdent aýqymdy reformalardyń arqasynda Qazaqstan jańa turpatty elge aınala bastaǵanyn, azamattardyń bolmys-bitimi, minez-qulqy, dúnıetanymy ózgerip jatqanyn aıtty.
— Qazaqstan — quqyqtyq memleket. Elimizdiń Bas qujaty — Konstıtýtsııasynda dál osylaı jazyldy. Biraq quqyqtyq el bolý Ata zańda ǵana bekitilip qoıǵan qaǵıdat emes. Osyny durys túsinýimiz kerek. Quqyq kúndelikti kúıbeń tirlikten bastalýy qajet. Bul — ár adamnyń júris-turysy, ádebi, tártibi, tipti, minez-qulqy zańǵa qaıshy bolmaýy kerek degen sóz. Ata Zańǵa sáıkes, biz — zaıyrly memleketpiz. Alaıda, zaıyrly bolý ult bolmysynan attaý nemese halqymyzdyń boıynda bar qundylyqtardy umytý degen uǵym emes, — dedi Prezıdent.
Ozyq, zamanaýı eldiń azamattary eń aldymen qoǵamda, ıaǵnı, kópshilik ortada, ásirese, jumys ornynda ózderin oryndy ustaı bilýi qajet.
— Mysaly, sońǵy ýaqytta kóp adamdardyń, tipti, amandasý kezinde óreskel, orynsyz áreketterge jol berip jatqanyn kórip júrmiz. Sondyqtan osy baǵyttaǵy jumysty kúsheıte túsý qajet. Bul — jaı ǵana shaǵyn másele emes. Ár halyqtyń turmystyq salt-dástúrine, ádet-ǵurpyna qarap shetel adamdary sol eldiń qanshalyqty mádenıetti, damyǵan jurt ekendigi jóninde paıym jasaıdy. Órkenıetti memleket qurý úshin birinshi kezekte halyqtyń mádenıeti joǵary bolýy tıis. Munyń bári qoǵamdyq oryndarda ádep saqtaý, ózin durys ustaý, ózara qurmet kórsetý syndy negizgi qaǵıdalardan bastalatyny anyq, — dedi Q. Toqaev.
Prezıdent osy qundylyqtardy keńinen dáripteý arqyly qoǵamda jańa etıkalyq normalardy ornyqtyrý qajettigin jetkizdi.
— Bul — barshamyzǵa ortaq mindet. Medıtsına qyzmetkerleri osy óte mańyzdy másele boıynsha búkil qoǵamymyzǵa úlgi kórsetýi kerek, — dedi Qasym-Jomart Toqaev.
Aıta keteıik, Aqordada Prezıdent medıtsına qyzmetkerlerin kásibı merekesimen quttyqtady. Elimizde maýsymnyń ər úshinshi jeksenbisi — medıtsına qyzmetkerleriniń kúni. Bul kúndi atap ótý QR Prezıdentiniń 1998 jylǵy Jarlyǵymen belgilengen.
Jańa Konstıtýtsııada «ult saýlyǵy» uǵymyna alǵash ret nazar aýdaryldy.
Prezıdent medıtsına qyzmetkerlerine kúsh kórsetken adamdardy qylmystyq jaýapkershilikke tartý týraly da pikir bildirdi.
