Prezıdent zańǵa qol qoıdy: Jer, Orman, Kásipkerlik, Bıýdjet, Sý kodeksterine ózgeris engiziledi
ASTANA. KAZINFORM – Memleket basshysy «Qazaqstan Respýblıkasynyń keıbir zańnamalyq aktilerine azamattyq qorǵaý, elektr energetıkasy jáne memlekettik múlikti basqarý máseleleri boıynsha ózgerister men tolyqtyrýlar engizý týraly» Qazaqstan Respýblıkasynyń Zańyna qol qoıdy. Bul týraly Aqordanyń baspasóz qyzmeti habarlady.
Zań arqyly Jer, Orman, Kásipkerlik, Bıýdjet, Sý kodeksterine, sondaı-aq «Azamattyq qorǵaý týraly», «Qazaqstan Respýblıkasynyń qorǵanysy jáne Qarýly Kúshteri týraly», «Quqyq qorǵaý qyzmeti týraly», «Memlekettik múlik týraly» zańdary men basqa da normatıvtik-quqyqtyq aktilerge ózgeris engiziledi. Túzetýlerdiń birinshi blogy órt qaýipsizdigin qamtamasyz etý deńgeıin arttyrýǵa baǵyttalǵan.
Orman órtterine jedel den qoıý maqsatynda memlekettik organdar men uıymdardy órt sóndirýge tartý tártibi reglamentteldi. Basqarý jáne ózara is-qımyl algorıtmi aıqyndaldy.
Adamdar jappaı baratyn obektiler men bıiktigi 28 metrden asatyn ǵımarattar paıdalanýǵa qabyldanar aldynda mindetti túrde azamattyq qorǵaý organdarynyń órt qaýipsizdigi talaptaryna sáıkestigi jóninde qorytyndy alýǵa mindetteledi.
Órt avtomatıkasy júıelerin montajdaý, júrgizý jáne tehnıkalyq qyzmet kórsetý qyzmetterin júzege asyrý úshin endi Tótenshe jaǵdaılar mınıstrliginiń ruqsaty qajet. Adamdar kóp baratyn, aýdany 2 myń sharshy metrden asatyn obektilerdiń ıeleri úshinshi tulǵalardyń ómirine, densaýlyǵyna jáne múlkine zııan keltirgeni úshin azamattyq-quqyqtyq jaýapkershilik júkteıtin saqtandyrýdyń úlgilik shartyn jasaýǵa mindetteledi.
Zańda órttiń aldyn alý jáne sóndirý jónindegi is-sharalarǵa óz erkimen qatysatyn adamdardy áleýmettik qorǵaý kepildikteri men sharalary kózdelgen. ıAǵnı olardyń jumys orny men ortasha jalaqysy saqtalady. Eger eńbek qatynasynda bolmasa, olarǵa eń tómengi jalaqy mólsherinde tólem jasalady.
Zań jergilikti atqarýshy organdardy dala órtin, memlekettik órtke qarsy qyzmet bólimsheleri joq eldi mekenderdegi órtti joıý úshin tartylatyn kúshter men quraldardy janar-jaǵarmaımen jáne tamaqpen qamtamasyz etýdi mindetteıdi. Túzetýlerdiń ekinshi blogy ónerkásiptik qaýipsizdikti jetildirýge baǵyttalǵan.
Ónerkásiptik qaýipsizdikke tekserýler júrgizýdiń erekshe tártibi men jedel yqpal etý sharalary qarastyrylǵan. Táýekel dárejesine qaraı baqylaý jáne qadaǵalaý sýbektileri (obektileri) táýekel dárejesi joǵary jáne táýekeldiń joǵary dárejesine jatpaıtyn sýbektiler (obektiler) bolyp bólinedi.
Táýekel dárejesi joǵary sýbektiler (obektiler) jyl saıyn tekseriledi, al ol sanatqa jatpaıtyn sýbektiler keminde 3 jylda bir ret tekseriledi.
Tekserýler jumystan tys ýaqytta (túngi ýaqytta, demalys, mereke kúnderi) júrgizilýi múmkin.
Túzetýlerdiń úshinshi blogy tótenshe jaǵdaıdyń aldyn alý jáne joıý máselelerin jetildirýge baǵyttalǵan.
Tótenshe jaǵdaıdyń aldyn alý jónindegi is-sharalardyń oryndalýyna baqylaýdy kúsheıtý úshin TJM-ge memlekettik baqylaý ókilettigi beriledi. Adamdardyń ómiri men densaýlyǵyn, ınfraqurylym obektilerin, ǵımarattar men qurylystardy jer silkinisinen qorǵaý maqsatynda
Zańda:
– seısmologııalyq stantsııalar jelisin jáne avtomattandyrylǵan erte habarlaý júıesin keńeıtý jáne jańǵyrtý;
– irgeli jáne qoldanbaly ǵylymı zertteýler, ǵylymı boljamdar júrgizý; – seısmıkalyq qaýipti aımaqtarda jer silkinisine tózimdi qurylys júrgizý jáne ǵımarattar men qurylystardy seısmıkalyq turǵydan nyǵaıtý, sondaı-aq seısmologııalyq monıtorıng júrgizý sharalary kózdelgen.
Zańda sondaı-aq Úkimet janyndaǵy jumys organy bolyp sanalatyn jappaı nemese óńirlik aýqymdaǵy tótenshe jaǵdaıdy joıý jónindegi Respýblıkalyq jedel shtab qyzmetiniń tártibi reglamenttelgen.
– Jergilikti nemese obekti aýqymyndaǵy tótenshe jaǵdaı kezinde ákimderge tabıǵı jáne tehnogendik sıpattaǵy tótenshe jaǵdaı jarııalaý ókilettigi berildi. Bul zııandy óteý jáne turǵyn úı obektileriniń ınfraqurylymyn qalpyna keltirýge baılanysty ýaqtyly sheshim qabyldaýǵa múmkindik beredi. Túzetýlerdiń tórtinshi blogy azamattyq qorǵanys júıesin jetildirýge baǵyttalǵan.
Endi ortalyq jáne jergilikti atqarýshy organdardan bólek, Respýblıka Prezıdentine tikeleı baǵynatyn jáne esep beretin memlekettik organdar da azamattyq qorǵanys is-sharalaryn júrgizedi.
Jergilikti atqarýshy organdarǵa TJM-niń aýmaqtyq bólimshelerine halyqty azamattyq qorǵanysqa daıarlaý jáne oqytý ortalyqtaryn qurýǵa, sondaı-aq jaraqtandyrýǵa járdem kórsetý quqyǵy berildi. Bul osy maqsattarǵa jergilikti bıýdjetten qarajat bólýge múmkindik beredi.
Túzetýlerdiń besinshi blogy qutqarýshylardyń mártebesin kóterý, olarǵa turǵyn úı tólemderi men kóterme járdemaqy berý, eńbekaqy mólsherin arttyrý, sondaı-aq áskerı nemese tótenshe jaǵdaı kezeńinde jumys istegeni úshin materıaldyq yntalandyrý sharalaryn ázirleý týraly Memleket basshysynyń tapsyrmasyn oryndaýǵa baǵyttalǵan.
Túzetýlerdiń altynshy blogy memlekettik múlikti basqarý máselelerin jáne elektr energetıkasy salasyn jetildirýge baǵyttalǵan.
Zań mátini baspasózde jarııalanady.
Aıta keteıik, Prezıdent Joǵarǵy sot tóraǵasy Aslambek Merǵalıevti qabyldady.