Prezıdent: Zań men tártip ıdeologııasy kúndelikti ómirdiń barlyq salasynda qatań saqtalýǵa tıis
ASTANA. KAZINFORM — Qasym-Jomart Toqaev ǵalymdardy marapattaý rásiminde qoǵamda zań ústemdigi qaǵıdatyn, ıaǵnı, zańǵa baǵyný mádenıetin túbegeıli ornyqtyrýymyz qajet ekenin aıtty. Bul týraly Aqorda málim etti.
— Zań men tártip ıdeologııasy kúndelikti ómirdiń barlyq salasynda qatań saqtalýǵa tıis: qoǵamdyq oryndaǵy júris-turys mádenıetinen, onyń ishinde jıyn-toılardan, turmystyq mádenıetten bastap, jolda kólik júrgizý mádenıetine deıin osy myzǵymas qaǵıdatqa saı bolýy kerek. Men buǵan deıin de óz sózderimde jol qaýipsizdigi máselesine arnaıy toqtaldym. Ókinishke qaraı, Qazaqstanda jyl saıyn kólik apatynyń kesirinen, sonyń ishinde kóp jaǵdaıda jol qozǵalysy erejesin óreskel buzýdyń saldarynan myńdaǵan adam kóz jumady. Buǵan jol berýge bolmaıdy. Buryn elimizde kólik apatynyń kóptigine joldyń nasharlyǵyn jeleý qylatyn. Sońǵy birneshe jylda barlyq óńirdegi jol ınfraqurylymyn aýqymdy túrde jańǵyrtýdy qolǵa aldyq. Biraq qaıǵyly oqıǵa azaımaı tur. Demek bul jaǵdaıǵa Úkimet pen qoǵam jiti nazar aýdarýy kerek. Azamattar bekitilgen erejelerdiń bárin múltiksiz saqtaıtyn kólik júrgizý mádenıetin qalyptastyrǵan durys. Polıtseılermen tájikelesý, tipti olarǵa shabýyl jasaý faktilerin tyıý qajet. Mundaı jaǵdaılarǵa, sondaı-aq quqyqtyq nıgılızm dertine shaldyqqan adamdardy, basqasha aıtqanda, sotqarlar men buzaqylardy «qaharman» jasaýǵa zań aıasynda qatań shara qoldaný kerek. Biz órkenıetti ult bolǵymyz kelse, polıtseılerdiń, dárigerlerdiń, muǵalimder men qyzmet kórsetý salasy mamandarynyń, jalpy, adal ári zańǵa baǵynatyn azamattardyń ar-namysyna tıetin kez kelgen áreketke batyl túrde tosqaýyl qoıýymyz qajet, — dedi Prezıdent.
Eske sala keteıik, osy jıynda Prezıdent «ozyq memlekettiń qazyǵy — ǵylym, al qazynasy — ǵalym» ekenin aıtty.
Toqaev ǵylymǵa kórsetilip jatqan júıeli qoldaý sharalaryna toqtaldy.
Prezıdent Konstıtýtsııa kúshine engen sátten bastap bir palataly Quryltaı saılaýyn ótkizý jónindegi Jarlyqqa qol qoıatynyn aıtty.
