Prezıdent Xinjiang Lihua kompanııasy dırektorlar keńesiniń tóraǵasyn qabyldady
ASTANA. KAZINFORM – Memleket basshysy Xinjiang Lihua kompanııasy dırektorlar keńesiniń tóraǵasy Chjan Tsıhaıdy qabyldady, dep habarlaıdy Aqorda.
Kezdesý barysynda Qazaqstanda tolyq óndiristik tsıkl jolǵa qoıylǵan maqta-mata klasterin júzege asyrý máselesi talqylandy.
Prezıdentke jobanyń ımportqa táýeldilikti aıtarlyqtaı azaıtyp, ishki naryqty básekege qabiletti otandyq ónimdermen qamtamasyz etýge múmkindik beretini jóninde baıandaldy.
Chjan Tsıhaı Qasym-Jomart Toqaevqa búginde birneshe nysan, sonyń ishinde eki maqta óńdeý zaýyty qoldanysqa berilgenin aıtty.
Taıaý jyldary sıntetıkalyq mata materıaldaryn, toqyma jáne kıim óndiretin nysandardy iske qosý josparlanyp otyr.
Jobany júzege asyrý arqyly maqta egistigin 52 gektarǵa deıin ulǵaıtýǵa bolady. Egin sharýashylyǵyna tsıfrlyq tehnologııalar men tamshylatyp sýarý sekildi ınnovatsııa paıdalanylady.
Maqta-mata klasteriniń alǵashqy kezeńinde 360 mıllıon dollarǵa jýyq tikeleı sheteldik ınvestıtsııa tartylyp, 4 myńnan asa jumys orny ashylmaq.
Memleket basshysy klaster elimizdiń ońtústik óńirinde agroónerkásip keshenin jáne jeńil ónerkásipti damytý turǵysynan mańyzdy ekenin atap ótti.
Prezıdenttiń pikirinshe, jergilikti turǵyndar arasynan bilikti maman daıarlaý isine mán berý kerek.
Qasym-Jomart Toqaev sý únemdeý tehnologııalaryn keńinen paıdalanýdyń ózektiligine nazar aýdardy, sondaı-aq maqta óndirisiniń shyǵynyn eskere otyryp, atalǵan salaǵa «aqyldy» tsıfrlyq sheshimder men jasandy ıntellektini engizýdi quptady.
Aıta keteıik, Memleket basshysy Qazaqstannyń agroónerkásip keshenin damytýǵa aıryqsha úles qosqany úshin Chjan Tsıhaıdy II dárejeli «Dostyq» ordenimen marapattady.
