Prezıdent World Boxing prezıdenti Gennadıı Golovkındi qabyldady
ASTANA.KAZINFORM — Qasym-Jomart Toqaev Gennadıı Golovkındi World Boxing halyqaralyq federatsııasynyń prezıdenti bolyp saılanýymen quttyqtady. Bul sheshimdi dańqty sportshynyń álemdik boksty damytýǵa qosqan úlesiniń, kásibıligi men minsiz abyroı-bedeliniń moıyndalǵany dep baǵalady. Bul týraly Aqorda málim etti.
– Siz álemdik sporttyń damýyna zor úles qostyńyz. Qazaq boks mektebiniń baı dástúrin laıyqty deńgeıde tanytyp, dúnıe júziniń elimizdi boks derjavasy retinde moıyndaýyna yqpal ettińiz. Ómir jolyńyz kóptegen jarqyn jeńiske toly. Oǵan kúsh-qýat, rýh, tabandylyq, ishki tártip sekildi qasıetterińiz arqyly jettińiz. Bul elimizde ǵana emes, shet memleketterdegi mıllıondaǵan jastyń jigerin janıdy. Esimińiz álemdik boks tarıhyna altyn árippen jazylǵanyna esh kúmán joq, – dedi Prezıdent.
Memleket basshysy tanymal sportshynyń Ulttyq olımpıada komıtetindegi qyzmetine joǵary baǵa berdi.
– Sizdiń basqarý salasyndaǵy jetistikterińizdi aıryqsha atap ótkim keledi. Sporttaǵy eńbegińizdi eskere otyryp, Sizdi Ulttyq olımpıada komıteti prezıdenttigine úmitker retinde usyndym. Ulttyq sport federatsııalarynyń barlyǵymen baılanys ornatyp, az ýaqytta kóp is tyndyrǵanyńyz úshin rızashylyǵymyzdy bildiremiz. Halyqaralyq Olımpıada komıtetimen yntymaqtastyqty jolǵa qoıdyńyz, – dedi Memleket basshysy.
Qasym-Jomart Toqaev Gennadıı Golovkınge World Boxing halyqaralyq federatsııasynyń prezıdenti retinde kóptegen máseleniń sheshimin tabýy qajet ekenin aıtty.
– Búginde sporttyq mansabyńyzdaǵy jańa kezeńge aıaq bastyńyz. World Boxing federatsııasynyń prezıdenti bolyp saılandyńyz. Jumys endi ǵana bastaldy. Aldyńyzda atqaratyn qyrýar sharýa tur. Sondaı-aq Sizdiń jahandyq deńgeıdegi sporttyq qurylymdy basqaryp otyrǵan alǵashqy qazaqstandyq ekenińizdi aıta ketý kerek. Kásibı biliktiligińiz uıymdy jańa beleske kóterip, boks kókjıegin keńeıtetinine senimdimin, – dedi Prezıdent.
Eske sala keteıik, buǵan deıin Qasym-Jomart Toqaev Túrikmenstan Prezıdentin Aqordada qarsy aldy.