Prezıdent: Volonterlik qozǵalys gýmanıtarlyq yqpaldastyqtyń mańyzdy bóligi bolýy kerek
ASTANA. KAZINFORM — Qazaqstan Prezıdenti Qasym-Jomart Toqaev Ortalyq Azııa elderi arasyndaǵy gýmanıtarlyq yqpaldastyqty kúsheıtýde volonterlik qozǵalystyń mańyzyn atap ótip, óńirlik jastar forýmyn ótkizýdi jáne mádenı, ǵylymı, sporttyq ári týrıstik is-sharalardyń biryńǵaı kúntizbesin qalyptastyrýdy usyndy. Bul týraly Aqorda málim etti.
— Elimizdiń «Taza Qazaqstan» jalpyhalyqtyq jobasyn iske asyrýdaǵy tájirıbesin aımaqtyq deńgeıde qolǵa alýǵa bolady. Bul bastama jastardy adamgershilik jáne azamattyq qundylyqtarǵa baýlıdy. Sondyqtan kelesi jyly «Ortalyq Azııa — izgi ister mekeni» degen uranmen volonterlik máselesine qatysty jastar forýmyn ótkizýdi usynamyn. Aımaqtaǵy ishki týrızmniń damýy arqyly halyqtardyń bir-birimen aralasýyna, elderimizdiń tarıhymen jáne mádenıetimen tanysýǵa jol ashyldy. Biz Ortalyq Azııa men Ázerbaıjandaǵy aýqymdy mádenı, ǵylymı, sporttyq jáne týrıstik is-sharalarynyń biryńǵaı kúntizbesin jasaýdy usynamyz. Bul barys-kelisti arttyryp, birlesken týrlar aıasynda sheteldik týrısterdi kóptep tartýǵa múmkindik beredi. Joǵaryda aıtylǵan usynystar óńirdegi yntymaqtastyqtyń berik gýmanıtarlyq tuǵyryn qalyptastyrady, — dedi Qasym-Jomart Toqaev.
Memleket basshysy sóz sońynda Konsýltatıvtik kezdesýlerdi jetildirý máselesin qozǵady.
— Menińshe, osy yntymaqtastyq formatyn taptaýryn qalyptan ada, kóshbasshylardyń tikeleı dıalog alańy retinde saqtaý mańyzdy. Budan bólek, jumys tıimdiligi usynystar men bastamalardyń sanymen emes, olardyń is júzindegi qundylyǵymen, nátıjesimen ólshenýi kerek dep sanaımyn. 2018 jyldan beri 200-den astam bastama kóterilgen. Degenmen onyń az ǵana bóligi iske asty. Muny bultartpas derekter aıǵaqtaıdy. Osy oraıda, syrtqy saıasat vedomstvolary aımaqtyq bastamalardy túgendep, olardyń ózektiligi men perspektıvasyn anyqtaǵany jón. Bul atalǵan formattyń tıimdiligin arttyryp, qol jetkizilgen ýaǵdalastyqtardy júzege asyrýǵa yqpal etedi, — dedi Qazaqstan Prezıdenti.
Otyrysta Túrikmenstan Prezıdenti Serdar Berdimuhamedov, Ázerbaıjan Prezıdenti Ilham Álıev, Qyrǵyzstan Prezıdenti Sadyr Japarov, Tájikstan Prezıdenti Emomalı Rahmon jáne Ózbekstan Prezıdenti Shavkat Mırzıeev sóz sóıledi.
