Prezıdent Vetnam Kompartııasy Ortalyq komıteti Saıası bıýrosynyń múshesi Ngýen Sýan Thangty qabyldady

ASTANA. KAZINFORM - Prezıdent Qasym-Jomart Toqaev Vetnam Kommýnıstik partııasy Ortalyq komıteti Saıası bıýrosynyń múshesi, Ho Shı Mın atyndaǵy Ulttyq saıasat akademııasynyń dırektory Ngýen Sýan Thangpen kezdesti.

Áńgimelesý barysynda Memleket basshysy búginde qazaq-vetnam qatynastary qarqyndy damyp kele jatqanyn atap ótti. Prezıdent Vetnamǵa jasaǵan byltyrǵy resmı saparyn yqylaspen eske aldy. Hanoı sapary barysynda júrgizilgen mańyzdy kelissózder ekijaqty yntymaqtastyqqa aıtarlyqtaı serpin berdi.

Qasym-Jomart Toqaevtyń aıtýynsha, Vetnam – elimizdiń Ońtústik-Shyǵys Azııadaǵy negizgi seriktesi. Qazaqstan saýda-ekonomıkalyq, ınvestıtsııalyq, mádenı-gýmanıtarlyq salalardaǵy ekijaqty qatynastardy jan-jaqty nyǵaıtýǵa daıyn.

Budan bólek, Memleket basshysy Qazaqstan men Vetnamnyń áleýmettik-ekonomıkalyq damýyn zańnamalyq turǵydan qamtamasyz etý úshin parlamentaralyq yntymaqtastyqty jandandyrýdyń mańyzyna toqtaldy.

Ngýen Sýan Thang eldiń Ortalyq komıteti Saıası bıýrosy men Ulttyq jınalysy Qazaqstan Prezıdentiniń Vetnamǵa sapary kezinde qol jetkizilgen ýaǵdalastyqtardy júzege asyrýǵa belsendi atsalysyp jatqanyn aıtty.

Onyń pikirinshe, elderimizdiń ustanymdary uqsas ári BUU, AÓSShK sııaqty kópjaqty alańdarda tabysty yntymaqtastyq ornatqan.

Qasym-Jomart Toqaev Qazaqstannyń strategııalyq zertteýler ınstıtýty men Ho Shı Mın atyndaǵy Ulttyq saıasat akademııasy arasynda yntymaqtastyq jónindegi memorandýmǵa qol qoıylǵanyn quptady. Bul qujattyń birlesken ǵylymı zertteýlerge tyń serpin beretinine senim bildirdi.

Memleket basshysy Vetnam Prezıdenti Lyong Kyongty kelesi jyly Qazaqstanǵa saparmen kelýge shaqyrdy ári ony Astana halyqaralyq forýmymen oraılastyrýdy usyndy.