Prezıdent Vetnam Kommýnıstik partııasy Ortalyq komıtetiniń Bas hatshysyna kóńil aıtty

ASTANA. KAZINFORM - Memleket basshysy Vetnam Kommýnıstik partııasy Ortalyq komıtetiniń Bas hatshysy To Lamǵa kóńil aıtty. Bul týraly Aqordanyń baspasóz qyzmeti habarlady.

Qasym-Jomart Toqaev jedelhatta Vetnamnyń ortalyq aımaqtarynda bolǵan sý tasqyny saldarynan kóptegen azamattyń qaza tapqany týraly sýyt habardy tereń kúızelispen qabyldaǵanyn jazǵan.

Prezıdent tabıǵı apattan qaıtys bolǵan adamdardyń týystaryna sabyr, al jaraqat alǵan jandardyń tezirek saýyǵyp ketýine tilektestik bildirgen.

Vetnamnyń ortalyq provıntsııalarynda nóser jańbyrlar men sý tasqyny saldarynan osy aptada 41 adam qaza taýyp, taǵy 9 adam iz-túzsiz joǵalǵanyn jazǵan bolatynbyz.