Prezıdent Vetnam Ulttyq jınalysynyń tóraǵasy Vyong Dın Hıýemen kezdesti
Qasym-Jomart Toqaev Vetnam Ulttyq jınalysynyń tóraǵasy Vyong Dın Hıýemen áńgime barysynda Qazaqstan eki el arasyndaǵy jan-jaqty yntymaqtastyqty odan ári damytýǵa basa mán beretinin aıtty.
Prezıdent ekijaqty kún tártibi aıasynda Vetnammen parlamentaralyq baılanystardy damytýǵa basa mán beretinine nazar aýdaryp, zań shyǵarý organdary arasyndaǵy ózara sapar almasý isin jandandyrýdy usyndy.
Vyong Dın Hıýe parlamentter arasyndaǵy ekijaqty qarym-qatynasty tereńdetý jónindegi Prezıdent Qasym-Jomart Toqaevtyń usynysyn qoldady.
– Sizdiń saparyńyz elderimiz arasyndaǵy dostyq qatynastardy nyǵaıtýǵa degen shynaıy nıetińizdi bildiredi. Sondaı-aq saparyńyz alǵa qaraı basqan mańyzdy qadam jáne Vetnam men Qazaqstan arasyndaǵy dástúrli ári kópjaqty yntymaqtastyqqa tyń serpin beredi dep oılaımyn. Sonymen qatar sizdiń Parlamentte uzaq jyl qyzmet etip, mol tájirıbe jınaǵanyńyz málim. Bul bizdiń zań shyǵarý organdary arasyndaǵy yntymaqtastyqty nyǵaıtý úshin paıdaly bolady dep sanaımyz, – dedi Ulttyq jınalys tóraǵasy.
