Prezıdent usynǵan Erik Sultanovtyń kandıdattyǵy SQO maslıhaty sessııasynda qoldaý tapty

Sessııa jumysyna QR Prezıdenti Ákimshiliginiń Memlekettik baqylaý jáne uıymdastyrý-aýmaqtyq jumys bólimi meńgerýshisiniń orynbasary Marat Sembekov qatysty.

Jınalǵan jurtshylyqtyń aldynda sóz alǵan Erik Sultanov QR Prezıdentine ózine senim artqany úshin jáne halyqtyń qoldaýy úshin alǵys aıtty.

«Prezıdent joǵary qurmet kórsetip, oblysty qaıta basqarýǵa senim bildirgeni úshin alǵys aıtamyn. Sizderge de meni qoldaǵandaryńyz úshin rahmet. Aldaǵy ýaqytta oblystyń damýy jolynda jemisti yntymaqtastyqta jumys atqaramyz dep senemin. Óńirdiń serpindi údemeli damýyn qamtamasyz etý úshin bar kúsh-jigerimdi, bilimimdi, tájirıbemdi paıdalanatynymdy asa jaýapkershilikpen málimdeımin. Oblysymyz eldiń eń damyǵan, gúldengen óńirleriniń birine aınalýy úshin onyń baı áleýetin ashýǵa kúsh salamyn», - dedi ol.

Oblys ákiminiń aıtýynsha, bul úshin alda naqty mindetterdi sheshý qajet. Eń bastysy agroónerkásiptik keshendi damytýǵa kóńil bólý qajet.

«Egis alańdaryn ártaraptandyrýdy jalǵastyrý qajet. Ónimdi barynsha kóp alý úshin bar kúshimizdi jumyldyramyz. Mal sharýashylyǵynda mal basyn arttyrý boıynsha jumystardy jalǵastyramyz. Asyl tuqymdy iri qara mal basyn kóbeıtý úshin aǵymdaǵy jyly oblysta 1,7 myń bas ІQM ósiretin 5  oryn qurý josparlanýda. Іri sharýashylyq qojalyqtaryn damytý baǵdarlamasy ázirlenýde. 14-15 maýsymda aýdan ákimderi baǵdarlamalaryn usynady», - dep málimdedi óńir basshysy.

Sondaı-aq, Erik Sultanov Memleket basshysynyń tapsyrmasy boıynsha aýyl sharýashylyǵy ónimderin qaıta óńdeý boıynsha jumystardyń jalǵastyrylyp jatqanyn atap ótti. Osy jyly somasy 1,7 mlrd. teńgege 12 jobany iske asyrý josparlanyp otyr. 25 maýsymda SQO-da aýyl sharýashylyǵy ónimderin qaıta óńdeýdi damytý boıynsha keshendi baǵdarlama usynylady.

Bul aldaǵy atqarylatyn jumystardyń keı baǵyttary ǵana. Bul jumystar barysynda taýarlar men qyzmetter óndirisi ósedi, eldiń ál-aýqaty, óńirde ómir súrý deńgeıi jaqsarady. Taıaý jyldary osynyń bárine qol jekizetinimizge senim bildiremin.

Sultanov Erik Hamzauly 1956 jyly 24 naýryzda Soltústik Qazaqstan oblysy Shal aqyn aýdanynda týǵan. Qaraǵandy polıtehnıkalyq ınstıtýtyn (qazirgi Qaraǵandy memlekettik tehnıkalyq ýnıversıteti) bitirgen.

1978-1993 jyldary «Ekibastuzshahtaqurylys» kombınatynda qyzmet atqarǵan.

1993-1994 jyldary - Ekibastuz qalalyq ákimdigi basshysynyń birinshi orynbasary.

1994-1995 jyldary - Qazaqstan Respýblıkasy Joǵarǵy Keńesi Qurylys, sáýlet jáne turǵyn úı-kommýnaldyq sharýashylyǵy jónindegi komıtetiniń múshesi, Qazaqstan Respýblıkasy Eńbek mınıstrligi janyndaǵy eńbek qorǵaý departamentiniń tóraǵasy.

1995-1996 jyldary - «Ekibastuzshahtaqurylys» óndiristik birlestiginiń prezıdenti.

1996-1998 jyldary - memlekettik múlikti basqarý jónindegi Pavlodar aýmaqtyq komıtetiniń tóraǵasy.

1998-1999 jyldary - Soltústik Qazaqstan oblystyq memlekettik múlik jáne jekeshelendirý aýmaqtyq komıtetiniń tóraǵasy, Soltústik Qazaqstan oblysy ákiminiń orynbasary.

1999-2000 jyldary - Qazaqstan Respýblıkasy Kólik jáne kommýnıkatsııalar mınıstrligi Avtomobıl joldary departamentiniń dırektory.

2000-2001 jyldary - Qazaqstan Respýblıkasy Kólik jáne kommýnıkatsııalar mınıstrligi Avtomobıl joldary departamentiniń syrtqy zaımdar jónindegi konsýltanttarynyń bas úılestirýshisi.

2001-2002 jyldary - «Qazaqavtojol» RMK bas dırektorynyń birinshi orynbasary.

2002-2004 jyldary - Qazaqstan Respýblıkasy Kólik jáne kommýnıkatsııalar mınıstrligi Avtomobıl joldary jáne ınfroqurylymdyq keshender qurylysy komıtetiniń tóraǵasy.

2004-2005 jyldary - Qazaqstan Respýblıkasy Kólik jáne kommýnıkatsııalar mınıstrligi Kólik ınfraqurylymyn damytý komıtetiniń tóraǵasy.

2005-2006 jyldary - «Qazaq jolqurylysy» JShS-niń bas dırektory.

2006-2008 jyldary - Astana qalasy ákiminiń orynbasary, birinshi orynbasary qyzmetterin atqarǵan.

2008-2014 jyldar aralyǵynda «QTJ» AQ-nyń Vıtse-prezıdenti. 2014 jyldyń mamyr aıynan bastap qazirgi qyzmetinde. «Qurmet» ordenimen marapattalǵan.