Prezıdent usynatyn saıası baǵyt «Amanat»-tyń ekinshi tynysyn ashady – Marat Sársembaev
«Partııanyń aty ózgerip, rebrendıng jasap jatqany ózgeristiń basy dep baǵalanýy kerek sııaqty. Partııalyq damýdyń bir kezeńi ótti desek bolady. Endi jańa kezeń kútip tur.
Partııa ári qaraı alǵa qalaı jyljýy múmkin degenge kelsek, kóp dúnıe quramyndaǵy adamdarǵa baılanysty. Onyń ústine bul bılik partııasy bolyp esepteledi. Partııa quramy qazirgiden de jańarady dep úmittenemiz. Onsyz da osynyń aldyndaǵy sezde aıtarlyqtaı jańarǵanyn bilemiz. Partııa organynyń basqarý quramyna basqa adamdar kirdi degendeı. Burynǵylardyń bir bóligi quramnan shyǵaryldy da. Osy turǵydan alsaq, qandaı da bir qozǵalystyń bar ekeni jaqsy. Onyń ishinde kadrlyq turǵydan da, partııa saıasaty turǵysynan da qozǵalys bar dep aıta alamyz», - deıdi ǵalym.
Zańger Prezıdent Qasym-Jomart Toqaevtyń 16 naýryzda jarııalaıtyn saıası reformalardyń jańa baǵdarlamasy «Amanat»-tyń ekinshi tynysyn ashady dep otyr.
«Endi ne bolady desek, bul Prezıdenttiń naýryz aıynyń ortasynda eldiń saıası damý joly týraly ne aıtatynyna baılanysty. Memleket basshysy retinde eldiń saıası damýyn qalaı kóretinine, kózqarasy qalaı bolatynyna kóp dúnıe baılanysty. Osy máselege jaýap alǵan kezde patııanyń qalaı jyljıtyny týraly naqtyraq boljam aıtýǵa bolady. Ázirge Prezıdent osy partııanyń basshysy bolǵandyqtan, «Amanat» partııasynyń alǵa jasaıtyn qadamy da sol kezde aıtylatyn máselelerge negizdeledi dep oılaımyn.
Prezıdent osy joly jańa saıası usynystar aıtady dep topshylap otyrmyn. Partııa osy reformalar aıasyndaǵy nusqaýlarmen, sheshimdermen qarýlanyp, ekinshi tynysy ashylady dep oılaımyn», - dedi sarapshy.
