Prezıdent: Ustaz – ár adamnyń ómirinen erekshe oryn alatyn tulǵa
ASTANA. KAZINFORM — Memleket basshysy muǵalimderdi kásibı merekesimen quttyqtady. Bul týraly Aqordanyń baspasóz qyzmeti habarlady.
Aqordada ustazdardyń kásibı merekesine oraı saltanatty is-shara ótti. Qasym-Jomart Toqaev pedagogterdi merekesimen quttyqtap, Muǵalim kúni búkil qoǵamdy biriktiretin, naǵyz halyqtyq sıpaty bar, qasterli de qadirli merekege aınalǵanyn atap ótti.
– Ustaz – ár adamnyń ómirinen erekshe oryn alatyn tulǵa. Buǵan eshkimniń de talasy joq dep oılaımyn, bul – bárimizge ortaq pikir. Ustazdy ulyqtaý órkenıetti qoǵamnyń bolmysyn aıqyndaıtyn asa mańyzdy qasıet sanalady. Ult oıshyly Abaı adamnyń adamdyǵy jaqsy ustazdan bolatynyn aıtqan. Halqymyzdyń zańǵar jazýshysy Muhtar Áýezov te «Ustaz – uly esim» dep qadir tutqan. Muǵalimder qaýymyna zor qurmetpen qaraý, olardyń ult bolashaǵy úshin atqaryp jatqan tabandy eńbegine alǵys aıtý – barshamyzǵa ortaq paryz. Ásirese, qazirgideı aqparattar aǵyny kúsheıip, ozyq tehnologııa qarqyndy damyǵan zamanda muǵalimniń róli áldeqaıda arta túskeni aqıqat, – dedi Prezıdent.
Qasym-Jomart Toqaev Memleket basshysy retinde ustazdardy jan-jaqty qoldaý jumysyna aıryqsha mán beretinin jetkizdi.
– Barshańyzǵa málim, biz «Pedagog mártebesi týraly» arnaıy zań qabyldadyq. Memlekettik marapattar tizimine «Qazaqstannyń eńbek sińirgen ustazy» ataǵy engizildi. Elimizde birneshe muǵalim eń joǵary memlekettik nagrada – «Qazaqstannyń Eńbek Eri» ataǵyna ıe boldy. 5 qazan kúni Ustazdardyń kásibı merekesi retinde naqty bekitildi. Biz jyl saıyn bir qoǵam bolyp osy meıramdy keń kólemde atap ótip júrmiz. Bıyl da mereke kúnderi barlyq aımaqta ákimder muǵalimder qaýymyn marapattap, olarǵa erekshe qurmet kórsetip jatyr. Ustazdardy dál osylaı jalpyulttyq deńgeıde ulyqtaý isi jalǵasyn tabady. Bul – memleketimiz úshin mán-mańyzy aıryqsha mindet, – dedi Prezıdent.
