Prezıdent úsh agenttiktiń fýnktsııalaryna ózgeris engizdi
ASTANA. KAZINFORM – Memleket basshysy Qasym-Jomart Toqaev qylmystyq jolmen alynǵan kiristerdi zańdastyrýǵa, terrorızmdi qarjylandyrýǵa jáne jappaı qyryp-joıý qarýyn taratýdy qarjylandyrýǵa qarsy is-qımyldy kúsheıtýge baǵyttalǵan birqatar jarlyqtarǵa ózgerister engizdi.
Prezıdent Jarlyǵymen úsh memlekettik organnyń, atap aıtqanda Qarjy naryǵyn retteý jáne damytý agenttiginiń, Básekelestikti qorǵaý jáne damytý agenttiginiń jáne Qarjylyq monıtorıng agenttiginiń fýnktsııalary keńeıtilip, naqtylandy.
Qujatqa sáıkes, Qarjy naryǵyn retteý jáne damytý agenttiginiń qylmystyq jolmen alynǵan kiristerdi zańdastyrýǵa jáne terrorızmdi qarjylandyrýǵa qarsy zańnama talaptarynyń saqtalýyna baqylaý jáne qadaǵalaý jónindegi ókilettikteri naqtylandy. Agenttiktiń baqylaý aıasyna Qazaqstannyń Eksporttyq-kredıttik agenttigi, beırezıdent bankter men saqtandyrý uıymdarynyń fılıaldary, beırezıdent saqtandyrý brokerleri, sondaı-aq ulttyq poshta operatory engizildi.
Sonymen qatar Básekelestikti qorǵaý jáne damytý agenttiginiń fýnktsııalaryna da ózgerister engizildi. Atap aıtqanda, agenttikke taýar bırjalarynyń, taýar bırjalarynda qyzmet atqaratyn jáne bırjalyq taýarlarmen mámile jasaıtyn bırjalyq brokerlerdiń, sondaı-aq taýar bırjalarynyń klırıngtik ortalyqtarynyń qylmystyq jolmen alynǵan kiristerdi zańdastyrýǵa, terrorızmdi qarjylandyrýǵa jáne jappaı qyryp-joıý qarýyn taratýdy qarjylandyrýǵa qarsy zańnama talaptaryn saqtaýyna baqylaý jasaý mindeti júkteldi.
Budan bólek, agenttikke qarjylyq monıtorıng jónindegi ýákiletti organmen kelisý arqyly taýar bırjalary, bırjalyq brokerler jáne klırıngtik ortalyqtar úshin ishki baqylaý qaǵıdalaryna qoıylatyn talaptardy bekitý fýnktsııasy berildi.
Qarjylyq monıtorıng agenttigi týraly erejege de birqatar ózgerister engizildi. Agenttik qylmystyq jolmen alynǵan kiristerdi zańdastyrýǵa, terrorızmdi nemese jappaı qyryp-joıý qarýyn taratýdy qarjylandyrýǵa qatysy bar dep kúdik týyndaǵan jaǵdaıda, jeke jáne zańdy tulǵalar, sondaı-aq zańdy tulǵa qurmaı áreket etetin sheteldik qurylymdar týraly aqparatty quqyq qorǵaý jáne arnaıy memlekettik organdarǵa joldaıdy ári bul jóninde Bas prokýratýrany habardar etedi.
Sondaı-aq agenttikke jarııa laýazymdy tulǵalardyń, olardyń jubaılary men jaqyn týystarynyń tizbesin júrgizý jáne ony qalyptastyrý tártibin aıqyndaý quzyreti berildi.
Budan bólek, qylmystyq jazasyn ótep shyqqan, biraq sottylyǵy áli alynbaǵan adamdardy terrorızm men ekstremızmdi qarjylandyrýǵa baılanysty tulǵalar tiziminen shyǵarý tártibin aıqyndaý jónindegi normalar naqtylandy.
Qarjylyq monıtorıng agenttiginiń fýnktsııalary kóleńkeli ekonomıkaǵa qarsy is-qımyl sharalaryn qabyldaýmen, qarjylyq monıtorıng salasyndaǵy táýekelderdi baǵalaý jumystaryn úılestirýmen jáne táýekelderdi tómendetýge baǵyttalǵan sharalardy iske asyrýmen tolyqtyryldy.
Sonymen qatar agenttikke qarjylyq monıtorıng sýbektileriniń zańnama talaptaryn saqtaýyna memlekettik baqylaý júrgizý, Úkimetke tıisti usynystar engizý, klıentterdi tıisti tekserý tártibin jáne jeke kabınet júrgizý qaǵıdalaryn aıqyndaý ókilettikteri berildi.
Atalǵan Jarlyq qoldanysqa engizildi.
Aıta keteıik, buǵan deıin Qasym-Jomart Toqaev Qarjylyq monıtorıng agenttiginde keńes ótkizip, vedomstvoǵa jasandy ıntellektini paıdalana otyryp analıtıkalyq jumysty kúsheıtýdi tapsyrǵan, sondaı-aq kásipkerlermen ózara is-qımyl tásilderin qaıta qaraý qajettigin atap ótken bolatyn.