Qazaqstan men AQSh korporatsııasy óńiraralyq saýda men ınfraqurylym jobalaryn talqylady
VAShINGTON. KAZINFORM — Prezıdent U.S. International Development Finance korporatsııasynyń (DFC) atqarýshy dırektory Ben Blekti qabyldady, dep habarlaıdy Aqordanyń baspasóz qyzmeti.
Bedeldi halyqaralyq qarjy ınstıtýty basshysymen kezdesýde ınvestıtsııalyq yntymaqtastyqty keńeıtý jáne birlesken jobalardy júzege asyrý perspektıvasy talqylandy.
Memleket basshysy korporatsııany Qazaqstannyń ornyqty damýdaǵy mańyzdy seriktesi dep atap, ekonomıkanyń túrli sektoryndaǵy yqpaldastyqty tereńdetýge ázir ekenin rastady.
— Ben Blek Prezıdent Donald Tramp pen onyń ákimshiligi Qazaqstanmen tyǵyz ári ózara tıimdi yntymaqtastyqty nyǵaıtýǵa basa mán beretinin aıtty. Osy oraıda ol aımaqtyq jáne óńiraralyq saýdany keńeıtýde strategııalyq mańyzǵa ıe taý-ken óndirisi, kólik-tranzıt ınfraqurylymy salalarynda birlesken jobalardy júzege asyrýdyń múmkindigi mol ekenine nazar aýdardy, — delingen habarlamada.
Aıta keteıik, osydan buryn Prezıdent Qasym-Jomart Toqaev Beıbitshilik keńesiniń alǵashqy otyrysynda sóz sóıledi.
Shara barysynda Toqaev Prezıdent Tramp atyndaǵy arnaıy nagradany bekitýdi usyndy.
Sonymen qatar, keńes otyrysy barysynda Qazaqstan Gaza sektoryndaǵy ahýaldy turaqtandyryp, qalpyna keltirý jumystaryna atsalysýǵa daıyn ekenin málimdedi.