Prezıdent Úndistan Respýblıkasyn Táýelsizdik kúnimen quttyqtady
ASTANA.KAZINFORM — Memleket basshysy Úndistan Respýblıkasynyń Táýelsizdik kúnine oraı Premer-mınıstr Narendra Modıge quttyqtaý jedelhatyn joldady. Bul týraly Aqorda málim etti.
— Prezıdent jedelhatynda Úndistannyń halyqaralyq qatynastardaǵy orny eleýli ekenin, sondaı-aq úlken ekonomıkalyq jetistikke jetip, zor ǵylymı-tehnıkalyq áleýetke ıe bolyp otyrǵanyn atap ótti, — delingen habarlamada.
Sonymen qatar eki el arasyndaǵy strategııalyq seriktestiktiń qarqyndy damyp kele jatqanyn joǵary baǵalap, túrli salada ózara yqpaldastyqty odan ári tereńdetýge mol múmkindik bar ekenine nazar aýdardy.
Qasym-Jomart Toqaev Narendra Modıdiń jaýapty qyzmetine tabys, al dostas Úndistan halqyna baq-bereke tiledi.
Buǵan deıin Prezıdent Pákistannyń Táýelsizdik kúnine oraı quttyqtaý jedelhattaryn joldaǵan bolatyn.
