Prezıdent Úndistan Premer-mınıstrin Qazaqstanǵa memlekettik saparmen kelýge shaqyrdy
ASTANA. KAZINFORM — Prezıdent Úndistannyń Premer-mınıstri Narendra Modıdiń týǵan kúnine oraı quttyqtaý jedelhatyn joldady. Bul týraly Aqordanyń baspasóz qyzmeti málim etti.
Qasym-Jomart Toqaev Narendra Modıdiń tegeýrindi ári parasatty basshylyǵymen Úndistan ekonomıkalyq ósim, ornyqty damý jáne ǵylymı-tehnıkalyq áleýet turǵysynan jahandyq kóshbasshylardyń biri retinde pozıtsııasyn nyǵaıtyp kele jatqanyn atap ótti.
— Memleket basshysy Nıý-Delıde ótken BRIKS sammıti barysynda kórsetilgen syı-qurmet pen qonaqjaılyq úshin Úndistan Úkimetiniń jetekshisine rızashylyǵyn bildirdi, — delingen Aqordanyń habarlamasynda.
Sondaı-aq Narendra Modımen ekijaqty kezdesý nátıjeli bolǵanyna nazar aýdaryp, ony Qazaqstanǵa memlekettik saparmen kelýge shaqyrdy.
Qasym-Jomart Toqaev Premer-mınıstrdiń memlekettik qyzmetine tabys, al dostas Úndistan halqyna baq-bereke tiledi.
Buǵan deıin Úndistan Premer-mınıstri óziniń X paraqshasynda Qasym-Jomart Toqaevpen nátıjeli pikir almasqany týraly jazǵanyn habarlaǵan edik.
