Prezıdent úndeýi eldiń jańa kelbetin qalyptastyrýǵa baǵyttalyp otyr – Altynbek Nýhuly
NUR-SULTAN. QazAqparat - Prezıdent úndeýi qazaq eliniń jańa kelbetin qalyptastyrýǵa baǵyttalyp otyr. Bul pikirdi QR Parlamenti Senatynyń depýtaty Altynbek Nýhuly ortaǵa saldy. Sondaı-aq, halyq qalaýlysy Memleket basshysy qoıǵan mindetterdi iske asyrýda barsha qazaqstandyqtardy aıanbaı atsalysýǵa shaqyrdy, dep habarlaıdy QazAqparat tilshisi.
«Memleket basshysy Qasym-Jomart Kemeluly elimiz úshin mańyzdy úndeý jarııalady.
Prezıdent qoǵamdy alańdatqan ózekti máselelerdi kóterip, naqty sheshimder usyndy. Sonyń keıbireýine toqtalsaq, ekonomıkamyzdyń basym bóligin quraıtyn «Samuryq-Qazyna» ál-aýqat qorynyń qyzmetin túbegeıli saralaý tapsyryldy. Ýtılızatsııalyq alymdy jınaý memlekettiń quzyryna ótý kerek ekendigi aıtyldy. Bul sońǵy jyldary kópshilik kóterip kele jatqan másele bolatyn», - dedi Altynbek Nýhuly.
Onyń aıtýynsha, Prezıdent jastar saıasatyna da erekshe nazar aýdardy.
«Jastarǵa maqsatty granttar bólýden basqa, otandyq joǵary oqý oryndarynyń sapalyq deńgeıin kóterý kerektigi aıtyldy. Sonymen qatar elimizde sheteldik belgili bes ýnıversıtettiń fılıalyn ashý týraly tapsyrma berdi. Tehnıkalyq bilim berýge basymdyq bere otyryp, osy baǵyttaǵy eki joǵary oqý ornynyń fılıalyn batys óńirinde ashý qajettiligi aıtyldy. Jalpy alǵanda Prezıdent úndeýi qazaq eliniń jańa kelbetin qalyptastyrýǵa baǵyttalyp otyr. «Betege ketse bel qalar, bekter ketse el qalar, berekeń ketse neń qalar» demekshi, berekemiz ketýden saqtasyn, endi myna joldaý birligimizdi kúsheıtip, berekemizdi bekem qylar bastaý bolsyn. Memleket basshysy qoıǵan mindetterdi iske asyrýda aıanbaı atsalysaıyq», - deıdi Senat depýtaty.
Foto: neark.kz
