Prezıdent «Uly dalanyń jeti qyry» atty maqalany nege jazdy

ASTANA. QazAqparat - Elordadaǵy Táýelsizdik saraıynda ótip jatqan VIII Azamattyq forýmda Elbasy Nursultan Nazarbaev «Uly dalanyń jeti qyry» atty maqalany ne úshin jazǵanyn aıtty, dep habarlaıdy QazAqparat tilshisi.

«Keńes zamanynda tarıhtyń barlyǵy 1917 jylǵy qazan revolıýtsııasynan bastalady dep oılaıtynbyz. Ary qaraı tarıhty eshkim bilmeıtin. Qazaqsyń ba, qazaqsyń. Qaıdan shyqtyń, túbiń kim degen sózderge bizdiń balalar jaýap bere almaıtyn. Al bizdiń tamyrymyz basqa halyqtardaı tereńde jatyr. Búgingi ıtalııalyqtar rımdikter emes. Biraq, olar sol tarıhtaryn maqtan tutady. Búgingi Mysyrda arabtar turǵanymen olar farondar zamanyn biledi. Barlyq halyqtyń tarıhy tereńde jatyr. Reseıdiń de, Ulybrıtanııanyń da úlken tarıhy bar sııaqty tek qazaqtardyń ǵana emes Qazaqstan halqynyń úlken tarıhy bar», - dep atap ótti Elbasy.

QR Prezıdentiniń atap ótýinshe, Uly dalada kóptegen halyqtar tirshilik etti. Olar ózderiniń mádenıetin, tanym-túsinigin, bilimin, tili men dilin bizge mura etip qaldyrdy.

«Sondyqtan qazaq halqy tolerantty, bárine birdeı qaraıdy. Bul úlken baqyt. Biz tarıhty qazaqtar osyndaı erekshemiz dep aıtý úshin eske alyp otyrǵanymyz joq. Qudaı saqtasyn. Biz túp-tamyrymyzdyń qaıdan shyqqanyn bilý úshin eske alamyz. Sondyqtan «Uly dalanyń jeti qyry» atty maqala jastarǵa saqtardan, ǵundardan, Túrki qaǵanattan bastalatyn Uly dalanyń tamyry tereńde ekendigin aıtýǵa degen nıetten týyndady. Biz sol úlken tarıhtyń tasymaldaýshysymyz», - dedi Memleket basshysy.