Prezıdent «Uly dala joryǵy» marafon-báıgesiniń qatysýshylaryn quttyqtady
NUR-SULTAN. QazAqparat – Elordanyń «Qazanat» ıppodromynda «Uly dala joryǵy» respýblıkalyq marafon-báıgesi bastaldy, dep habarlaıdy QazAqparat tilshisi.
Marafonnyń ashylý saltanatynda QR Parlamenti Májilisiniń tóraǵasy Erlan Qoshanov Memleket basshysy Qasym-Jomart Toqaevtyń quttyqtaý hatyn oqyp berdi.
«Qurmetti qaýym! Sizderdi «Uly dala joryǵy» marafon-báıgesiniń bastalýymen quttyqtaımyn! Ulttyq sportty damytýǵa jáne dástúrimizdi dáripteýge arnalǵan alaman jarys elimizde tuńǵysh ret ótkizilip otyr. Adamzat tarıhynda jylqy eń alǵash qazaq dalasynda qolǵa úıretilgeni belgili. Bul álemdik órkenıetke teńdessiz betburys ákelgen jańalyq sanalady. Bizdiń babalarymyz uly dala shejiresin tulpardyń tuıaǵymen jazǵan, búgingi urpaq – sol kóshpendiler mádenıetiniń zańdy murageri», - dep jazylǵan Prezıdent quttyqtaýynda.
Memleket basshysy qazaq pen jylqy egiz uǵym ekenin, arǵymaq atty halqymyzdyń sımvoly deýge bolatynyn jetkizdi.
«Biz qazirgi zamannyń jaqsy qasıetterin boıǵa sińire otyryp, ulttyq bolmysymyzdy jańǵyrtýǵa tıispiz. Búgingi báıgeniń basty maqsaty osy. Ár óńirden kelgen shabandozdar keń baıtaq qazaq dalasyn kókteı ótip, qasıetti Túrkistan qalasyna at basyn tireıdi. Bul naǵyz azamattar men qazanattar synalatyn doda. Sondaı-aq elimizge rýhanı serpilis ákelip, jastardy otanshyldyqqa baýlıtyn biregeı joba. Alaman báıge ultymyzdyń rýhyn asqaqtatyp, mereıin asyra túsedi dep senemin. Barshańyzǵa sát-sapar tileımin», - deıdi Q. Toqaev.
Aıta keteıik, elimizde alǵash ret 1200 shaqyrymdyq «Uly Dala Joryǵy» marafon-báıgesi ótedi.
Marafonshylar 18 qyrkúıekte Nur-Sultan qalasynan attanyp, Uly dalanyń boıymen 12 kúnde 1200 shaqyrymnan asa qashyqtyqty basyp ótip, 29 qyrkúıekte Túrki áleminiń rýhanı astanasy – Túrkistan qalasyna at basyn tireýi kerek. Qatysýshylarǵa túrkilerdiń kıeli jerleri – Joshy han, Alasha han keseneleri, sondaı-aq Qazaq handyǵynyń alǵashqy astanasy Sozaq qalasy pen túrki rýhanııatynyń besigi Túrkistan qalasy sııaqty tarıhı oryndarǵa, Áziret-Sultan kesenesine zııarat jasaýǵa múmkindik týady.
Belgilengen qashyqtyqty bastan-aıaq eń az ýaqytta júrip ótken komanda marafonnyń jeńimpazy dep tanylady. Jeńimpazdarǵa aqshalaı syılyqtar men «Uly Dala Sarbazy» ataǵy beriledi.
1-oryn úshin júlde qory – 30 000 000 teńge men Kýbok bolsa, 2-orynǵa – 20 000 000 teńge men Kýbok jáne 3-oryn úshin – 15 000 000 teńge men Kýbok beriledi.
