Prezıdent: Ulttyq valıýtaǵa jasalǵan spekýlıatıvti shabýyldardy azaıtýdyń mańyzy asa zor
NUR-SULTAN. QazAqparat – Memleket basshysy Qasym-Jomart Toqaev sheteldik kapıtalǵa degen báseke qyzǵan shaqta kapıtaldy ustaýshynyń árbirimen tikeleı jumys júrgizý kerektigin málim etti, dep habarlaıdy QazAqparat tilshisi.
«Altynshydan, sheteldik kapıtalǵa degen báseke qyzǵan shaqta kapıtaldy ustaýshynyń árbirimen tikeleı jumys júrgizýge kóshý kerek. Jalpy, ekonomıkaǵa beriletin basymdyq pen áleýetti tıimdilik retinde árbir ınvestorǵa jeke qoldaý sharalaryn ázirlegen abzal. Osynaý mańyzdy jumys aıasynda Úkimet basymdyqqa ıe salalarda strategııalyq ınvestorlar úshin búkil ınvestıtsııalyq zańnamanyń turaqty rejımin qamtamasyz etýi tıis», - dedi Prezıdent Tótenshe jaǵdaı rejımin qamtamasyz etý boıynsha memlekettik komıssııa otyrysynda.
Memleket basshysy elge ınvestıtsııa tartyp, qarjy qoryn damytý úshin «Astana» HQO-nyń áleýetin paıdalaný kerektigin eske saldy.
«Memlekettik aktıvterdi jekeshelendirý aldynda bul jumystyń mańyzy zor. Sonymen qatar bıznes-kelispeýshilikterdi retteýde qazaqstandyq kásipkerlerdiń AHQO aǵylshyn soty men arbıtrajynyń basymdyǵyn paıdalaný boıynsha qoljetimdiligin qamtamasyz etý kerek. Ulttyq kompanııalarǵa tıesili jekelegen qurylymdar kezeń-kezeńmen osy jumysty bastaýy tıis. Eger ózimizdiń ınvestorlar sheteldik ıýrısdıktsııany tańdaıtyn bolsa, shetel ınvestorlarynyń senimine ıe bola almaımyz. Úkimet, SІM men sheteldik ókildikter AHQO rezıdenttiginiń sheteldik salyqtyq baǵdarlamasyn nasıhattaýdy kúsheıtýi tıis. Ortalyqtyń Ákimshiligi 2025 jylǵa deıin jańa Strategııa boıynsha jumys júrgizedi. Qazirgi jaǵdaıda ınvestorlardyń senimi, bıznestiń ulttyq valıýta men aqshalaı-nesıelik saıasatqa seniminiń mańyzy zor. Osyǵan baılanysty ulttyq valıýtaǵa jasalǵan spekýlıatıvti shabýyldardy azaıtýdyń mańyzy asa zor. Bul – Ulttyq bank pen Qarjy naryǵyn retteý agenttiginiń mindeti», - dedi Prezıdent.
